Խորհրդային տարիներին Իջեւանի «Սպիտակ ջուր» ջրամբարը հանգստի սիրված գոտի էր: Սակայն ջրահեռացման համակարգում խնդիրների պատճառով արհեստական լիճը տարիներ շարունակ հագեցել է ջրաբերուկ տիղմով եւ ավազով:
Այն գրեթե ամբողջությամբ ցամաքել էր, դարձել անասունների արոտավայր: 2014թ. հոկտեմբերին Իջեւանի քաղաքապետարանը՝ քաղաքապետ Վարդան Ղալումյանի ղեկավարությամբ ձեռնարկել է Աղստեւ գետի հունը բացելու գործողություն, ջրամբարի ջրթող փականները մասամբ բացել են, տրակտորը գետի հունը` մաքրել:
Սակայն դա բավարար չէր արհեստական լճում կուտակված մեծաքանակ տիղմը մաքրելու համար: Չորացած ջրամբարի տարածքում վերջին տարիներին էքստրեմալ ավտոսպորտի մրցումներ էին անցկացվում:
Վարդան Ղալումյանը հայտնեց, որ այսօր՝ սեպտեմբերի 6-ին կատարվել է ջրթող անսարք փականների պայթեցման գործողություն: Այն իրականացրել են մասնագետ պայթեցնողներ: Քաղաքապետն ասաց, որ փականների պայթեցումը հնարավորություն կտա ջրամբարն ամբողջությամբ մաքրել տիղմից եւ ջրաբերուկներից:
Ոսկան ՍԱՐԳՍՅԱՆ
