«Առավոտին» մոռացել էին տեղեկացնել արտաքին հարաբերությունների հասարակական հանձնաժողովի նիստի մասին եւ մեր խնդրանքով նախագահի արտաքին քաղաքական հարցերով խորհրդական Արամ Սարգսյանն ինքը համառոտ ներկայացրեց, թե ինչ էր քննարկվել այդ 2 ժամից ավելի տեւած նիստում. «Քննարկվեց Եվրոպա-Հայաստան հարաբերությունների հնարավոր զարգացումը եւ հեռանկարները։ Ներկայացված էին 2 զեկուցում։ Շատ լավ, ակտիվ քննարկում ընթացավ։ Շատ ենք կարեւորում եւ առաջնային ենք համարում եվրոպական ուղղությունը մեր քաղաքականության մեջ։ Եվ գլխավորն այն է, որ բոլոր ելույթ ունեցողները տարբեր տեսանկյուններից էին դա դիտարկում։ Իհարկե, կան բարդություններ այս կամ այն երկրի հետ քաղաքականություն վարելիս։
Շատ կարեւորվեց Եվրոմիության նշանակությունը եւ նաեւ ապագայում մեր տեղը ոչ միայն Եվրոմիության կազմում, այլ ընդհանրապես այդ գործընթացում։ Մենք շատ մտահոգված ենք, իհարկե, նրանց տարածաշրջանային քաղաքականությամբ։ Չենք կարող նաեւ անտեսել Լեռնային Ղարաբաղի հանդեպ նրանց վերաբերմունքը եւ այլն։ Սա հերթական այսպիսի քննարկումն է, որի արդյունքում ձեւավորվում են առաջարկություններ, իսկ հետո նոր՝ մասնագիտական խումբն ավելի նեղ շրջանակում «ուղեղային հարձակմամբ» է զբաղվում եւ ձեւավորում երաշխավորությունների մի փաստաթուղթ»։
Ա. Ի.
