Ամիսներ առաջ ՀԿԿ Կենտկոմը դիմել էր ՀՀ գլխավոր դատախազություն, պահանջելով ուսումնասիրել Էներգետիկայի անկախ հանձնաժողովի աշխատանքները։ «Առավոտը» փորձեց պարզել, թե կոմունիստների վերոհիշյալ պահանջը ի՞նչ ընթացք ունեցավ։ ՀԿԿ Կենտկոմի առաջին քարտուղար Սերգեյ Բադալյանն ասաց. «Ոչ մի արձագանք դատախազությունից չկա։ (…) Մարդիկ, երբ բողոքում են, ես, իհարկե, փորձում եմ պատասխանել, բայց իրականում այս իշխանություններից ոչ մի բան հնարավոր չի սպասել. ո՛չ էլեկտրաէներգիայի սակագները կիջեցնեն սրանք, ոչ հեռախոսավարձը, ո՛չ էլ գործ կհարուցեն։ (…) Այս սնանկ երկրում ոչ մի բան հնարավոր չի անել։ (…) Մենք սա շատ լավ հասկանում ենք եւ ասում ենք՝ ելքը միայն արմատապես ամբողջ համակարգի փոփոխության մեջ է, այսպես Հայաստանը ոչնչանալու է։ Մենք ծիծաղում ենք, երբ որ արշակսադոյանները ոչնչացնում էին այս երկիրը, այսօր էլ փորձում են միավորներ վաստակել ժողովրդի միամտությունն օգտագործելով՝ սա քայլ չէ։ Մենք այդ քայլն արեցինք (դատախազություն դիմելը- Մ. Ե.) միայն օրինականության սնանկությունը ցույց տալու համար։ Մենք գիտենք, որ դատախազությունը ոչ մի բան չի կարող անել»։
Վերջում հիշեցնենք, որ «Էլեկտրաէներգիայի սակագների սառեցման մասին» օրենքի նախագծի երկրորդ ընթերցմամբ ներկայացնելու օրը ընկեր Բադալյանը խորհրդարանում չի եղել եւ, հասկանալի է, չի քվեարկել, ոչ կողմ, ոչ դեմ։ Երբ այս մասին հարցրինք, ընկեր Բադալյանն ասաց, թե այդ օրն ինքը արտասահմանում է եղել։
Մ. Ե.
