Էդվարդ Եգորյանի այն պնդմանը, թե «Շամիրամը» տեղամասային հանձնաժողովներում իր բոլոր տեղերն իշխանությանն է հանձնել, «Շամիրամի» նախագահ Շողեր Մաթեւոսյանն այսպես արձագանքեց. «Եգորյանը թող իր կուսակցության արշինով մեզ չչափի՝ մեկ։ Եվ երկրորդը, «Հայրենիքը» մեզնից տեղեր է խնդրել, մենք չենք զիջել։ Քանի որ, բնականաբար, նրա կուսակցության շահերը «Շամիրամի» շահերին չեն համընկնում»։
ԱՐՁԱԳԱՆՔ-2
Էդվարդ Եգորյանի մյուս պնդմանը, թե ՀՀՇ-ն էլ իր տեղերի մեծամասնությունը նույնպես իշխանությանն է տվել, արձագանքեց ՀՀՇ նախընտրական շտաբի ղեկավար Անդրանիկ Հովակիմյանը. «Բնական է, որ «Հայրենիքի» գործիչները պարբերաբար ինչ-որ բաներ պիտի ասեն ՀՀՇ-ի հասցեին, քանի որ նպատակ ունեն 5%-ը հաղթահարել հիմնականում ՀՀՇ-ի ընտրազանգվածի շնորհիվ։ Մենք փաստեր ունենք, որ հենց «Հայրենիքն» է որոշ մարզերում իշխանությանը տեղեր զիջել, բայց քանի որ նպատակ չունենք կուսակցություններին վարկաբեկելով ձայներ հավաքել՝ այդ մասին չենք ասի, քանի որ դա նաեւ անբարոյական ենք համարում»։
Կարդացեք նաև
ՊԱՐԶԱԲԱՆՈՒՄ Է ՀՐԱՄԱՆԱՏԱՐԸ
Մամուլում հրապարակված «Արաբո» կամավորական ջոկատի ռազմական խորհրդի հայտարարության եւ պատգամավորության թեկնածու Էդուարդ Մադաթյանի պատասխանի կապակցությամբ ջոկատի հրամանատար Մանվել Եղիազարյանը «Առավոտի» համար պարզաբանեց. «Արաբո» ջոկատին եւ պատերազմում հաղթած բոլոր ազատամարտիկներին բարոյապես աջակցել է ամբողջ հայ ժողովուրդը, նյութապես օգնել են հարյուրավոր մարդիկ, ինչի համար խորապես շնորհակալ ենք։ Բայց երբ պրն Մադաթյանը իրեն է վերագրում «Արաբո» ջոկատի կազմավորումը, այսինքն՝ ջոկատի ստեղծմանն ուղղված կազմակերպչական ջանքերը, դա պարզապես սուտ է եւ կեղծիք, որի դեմ մարտական ընկերներն ու ես չենք կարող չբողոքել»։
2 ՍԵՆՅԱԿ՝ ԱԺ-ԻՑ
Խորհրդարանը միջազգային մի կազմակերպությունից 30 համակարգիչ է նվեր ստացել եւ այդ ընծայի դիմաց ԱԺ-ի սենյակներից երկուսը հանձնել է տվյալ կազմակերպության տնօրինությանը։ Չար լեզուներն ասում են, որ այդ կազմակերպությունն իրականում Արեւմուտքի «էկզոտիկ» կազմակերպություններից է։
ԿԵՆՏՐՈՆՆ ԱՌԱՆՑ 20 ՏՈԿՈՍԻ
Երեւանի կենտրոնի բնակչության 20%-ը բացակայում է քաղաքից եւ ակնհայտորեն չի կարող մասնակցել ընտրություններին։
Սեփ. լր.
