Ջերմուկի 71 ընտրատարածքի 2-րդ եւ 3-րդ տեղամասերից մեզ հայտնեցին, որ թիվ 2 տեղամասի հանձնաժողովի 8 անդամներ (Թադեւոսյան Սամվել- «Միասնություն», Պետրոսյան Արսեն- ՀՀՇ, Խաչատրյան Ծովիկ, Ղարիբյան Վարսենիկ, Միրզոյան Նորիկ- ՀՀ կառավարություն, Եղիազարյան Մարիետա- «Օրինաց երկիր», Գալստյան Հրաչուհի- «Հայրենիք», Ստեփանյան Ռուբիկ- «Հայաստանի կոմունիստական կուսակցություն») բոյկոտել են տեղամասի նախընտրական աշխատանքների դեմ։
Նրանք երեկ անվստահության դիմում են ստորագրել թիվ 2 տեղամասի հանձնաժողովի նախագահ, «ԱԻՄ+»-ի ներկայացուցիչ Սերգեյ Եղիազարյանի եւ փոխնախագահի դեմ։ Արտահերթ այս նիստին հանձնաժողովի 13 անդամներից մասնակցել են 10-ը։ Կողմ քվեարկող վերոնշյալ անդամները հանձնաժողովի աշխատանքներին չմասնակցելու դիմում են տեղում գրել։
Նույն ընտրատարածքի 3-րդ տեղամասի հանձնաժողովի նախագահ, ՀՅԴ-ի ներկայացուցիչ Արմեն Գրիգորյանի հավաստմամբ ճնշումներ են գործադրվել 2-րդ հանձնաժողովի 4 անդամների նկատմամբ. «Չգիտեմ՝ ընտրակաշառք են խոստանում, թե ճնշում են գործադրում։ Ճնշումներ են նախապատրաստվում նաեւ իմ հանձնաժողովի վրա։ Արդեն իմ հանձնաժողովից 4 անդամների տարել են. մեկը՝ ՀՀՇ-ի մի ներկայացուցիչը, վերադարձել է, իսկ երեքը դեռ չկան»։ Այդ երեք անդամները «ԱԻՄ+»-ի, «ԱԺՄ»-ի եւ «Շամիրամի» ներկայացուցիչներ են։ Ըստ պրն Գրիգորյանի, ճնշում գործադրողները իշխանություններն են, որ իրենց տարբեր լծակների ու ղեկավարների միջոցով համոզել-տարել են հանձնաժողովի անդամներին։ Վերադարձած ՀՀՇ-ականը պատմել է, որ տանողները փորձել են համոզել, որպեսզի սա անվստահություն ներկայացնի Ա. Գրիգորյանի եւ վերջինիս տեղակալի նկատմամբ։ ՀՀՇ-ականը հրաժարվել է կատարել։ Ի դեպ, պարզվեց նաեւ, որ անհետացել է 2-րդ տեղամասի հանձնաժողովի նախագահ «ԱԻՄ+»-ի ներկայացուցիչ Սերգեյ Եղիազարյանի տեղակալի (որը նույնպես «ԱԻՄ+»-ից է) երեխան։ Ծնողները զայրացած են ու պատրաստ են դիմել ցանկացած քայլի։ Ս. Եղիազարյանն ասաց, որ պատրաստվում են դիմել ժողդատարան։ 8 հոգու կազմակերպած բոյկոտը նշանակում է հանձնաժողովի ձեւափոխում՝ հօգուտ իշխանությունների։ «ԱԻՄ+»-ի ներկայացուցիչների կարծիքով 2-րդ տեղամասում «ԱԻՄ+»-ի թեկնածուն առավել ուժեղ է «Միասնություն» դաշինքի թեկնածուից եւ այդ պատճառով իշխանությունները նման եղանակով են փորձում իրենց ուզածին հասնել եւ մտադիր են առաջին քայլով երկու այդ տեղամասերում իրենց մարդկանց նշանակել։
Ս. ՍԵՅՐԱՆՅԱՆ
