Հունիսի 17-ին, երեւանցիների կողմից Շրջանային կոչվող հատվածում, բնակարանամուտ տոնելու առիթ ունեցավ մի քանի տասնյակ ընտանիք, որոնց բնակարանների բանալիները հանձնեց ընդհուպ մինչեւ վերջին օրերը՝ քաղաքապետ, իսկ վերջին օրերին՝ ՆԳ նախարար Սուրեն Աբրահամյանը։ Երբ նա դուրս եկավ շենքից, «Առավոտը» նրան ուղղեց երկու հարց.
-Ի՞նչ է, այլեւս ներքին գործոց նախարարությունն է զբաղվում շենքերի ու բնակարանների հանձնման գործով։
-Ի՞նչ վատ կլինի որ։ Եթե ներքին գործոց նախարարությունը նաեւ այդ առաքելությունը ստանձնի, իմ կարծիքով, վատ չի լինի, նույնիսկ շատ լավ կլինի։ Թող նորանոր շենքեր հանձնվեն, թող մարդիկ նոր բնակարաններ ստանան։
-Իսկ ո՞ւմ կցանկանայիք տեսնել քաղաքապետի պաշտոնում՝ ձեզ փոխարինողի դերում։
Կարդացեք նաև
-Մի քիչ բարդ հարց է, դա իմ կոմպետենցիայի խնդիր չէ։ Ես կարող եմ հուշել, խնդրել, բացատրել, համոզել, բայց վերջնական որոշում ընդունելու իրավասությունը վերապահված է հանրապետության վարչապետին ու նախագահին։ Ես տակտով, դաստիարակված մարդ եմ։ Կաշխատեմ պարզապես իրենց համոզել իմ թեկնածուի հարցում։ Եթե դա տեղի ունենա, ապա իմ դեմքի արտահայտությունից դուք կհասկանաք՝ քաղաքապետն իմ սրտով է, թե՝ ոչ։
Այն էլ ասենք, որ Սուրեն Աբրահամյանը բժշկական համալսարանից մինչեւ ՆԳ նախարարություն քայլեց առանց թիկնազորի։ Ճանապարհին նրան փաթաթվեցին մի քանի կին (խոսքը՝ տատիկների մասին է) ու շնորհավորեցին նոր աշխատանքի անցնելու առիթով։ Այն էլ ասենք, որ Սուրեն Աբրահամյանը սաստեց մի քանի ոստիկանի, երբ նրանք փորձեցին դադարեցնել Նալբանդյան փողոցի երթեւեկությունը, որպեսզի նորանշանակ նախարարն անարգել փողոցն անցնելու հնարավորություն ունենա։ Նախարարը հանդիմանեց, որ այդպիսով իր նկատմամբ ոչ բարյացակամ վերաբերմունք կարող է ձեւավորվել։
Ա. Զ.
