Հայտարարությունն արված է։ Իսկ մինչ այդ, հասարակությունն էր փորձում հասկանալ, թե ինչու եւ ինչպես սեփականաշնորհվեց կապի համակարգը։
Միայն ալարկոտներն իրենց բացասական վերաբերմունքը չեն արտահայտել TWT-ի, OTE-ի եւ «ԱրմենՏելի» նկատմամբ։ Նույնիսկ ՀՀ նախագահի վերահսկողական ծառայության նախկին ղեկավար Դավիթ Վարդանյանն էր այս գործով զբաղվում։ Զբաղվելն, իհարկե, իր արդյունքը տվեց։ Պրն Վարդանյանը խիստ զբաղված լինելով, մեծամասնականով չառաջադրվեց, բայց ընտրվեց ԱԺ պատգամավոր։ Խոստացավ տալ «ԱրմենՏելի» սեփականաշնորհման վերլուծությունը։ Բայց ի զարմանս մեզ, նրա փոխարեն հայտարարություններ արեց Արշակ Սադոյանը։
Իսկ Դավիթ Վարդանյանը հրաժարական տվեց, հայտարարություն անելու հերթը հասավ պետական եկամուտների նախարար Սմբատ Այվազյանին։ Պարզվեց, որ ամերիկյան համարվող (կամ ներկայացող) TWT-ն եւ հունական OTE-ն շահութահարկ չեն մուծել 18 մլն դոլարի չափով։ Թե «ԱրմենՏելը», թե պետական եկամուտների նախարարությունը հրաժարվում են որեւէ կերպ մեկնաբանել։ «ԱրմենՏելի» լրատվության պատասխանատուն հրաժարվեց նույնիսկ պատասխանել՝ OTE-ի ղեկավարությունն արդեն տեղեկացված է դատական հայցի մասին, թե ոչ։ Պետական եկամուտների նախարարությունում նշեցին, որ առայժմ ոչինչ չեն ցանկանում ավելացնել արդեն արված հայտարարությանը։
«ԱրմենՏելը» սեփականաշնորհվել է 1998 թ. մարտին։ Գործող հարկային օրենսդրությամբ այդ պահին մուծվելիք շահութահարկը հավանաբար կազմում էր մոտ 8 մլն դոլար։ Ենթադրվում է, որ պայմանագրում եւ բանակցությունների ընթացքում խոսք չի գնացել հնարավոր շահութահարկի մասին։ Եվ ահա, սեփականաշնորհումից մեկ տարի երեք ամիս հետո, նոր միայն խոսք բացվեց շահութահարկի մասին։ Ընդ որում մոտ 10 մլն-ը գոյացել է տույժերի եւ տուգանքների գծով։ Կարելի է ենթադրել, որ դատական հայցի ձեւակերպումը ներիշխանական բախումների արդյունք է։ Բոլոր դեպքերում օտարերկրյա ներդրողի հանդեպ կարծես առաջին անգամ է նման քայլ արվում, եւ դեպքերի հետագա զարգացումը հետաքրքիր է դառնում։
Կարդացեք նաև
Ա. Գ.
