«Միասնության» պատգամավորներից մեկի վկայությամբ, փաստ է արձանագրվել, որ հոկտեմբերի 27-ի գործով կալանավորված Ալեքսան Հարությունյանն օգտվել է ԱԱՆ մեկուսարանի պետի կառավարական հեռախոսից։ ԱԱՆ նախարար Կառլոս Պետրոսյանն «Առավոտին» խոստացավ ավելի ուշ անդրադառնալ այս եւ ԱԱՆ-ի շուրջ այլ ասեկոսեներին։
ԻՄ ԿԱԲԻՆԵՏԸ ՔՈ ԿԱԲԻՆԵՏԻՑ ԼԱՎՆ Ա…
«Նման կաբինետ ես էլ ունեմ եւ կարող եմ այնտեղից պատասխաններ տալ»,- այսպես արձագանքեց վարչապետ Արամ Սարգսյանը լրագրողների խնդրանքին՝ մեկնաբանել Ռոբերտ Քոչարյանի հեռուստաելույթը։
Կարդացեք նաև
ՄԻՆՉԵՎ ԱՌՈՒՆ ՋՈՒՐ ԳԱ…
«Առավոտի» հարցին, թե «Միասնությունը» մտադի՞ր է արդյոք շարունակել պնդել Սերժ Սարգսյանի եւ Տիգրան Նաղդալյանի հրաժարականների պահանջը, ՀՀԿ նախագահ Անդրանիկ Մարգարյանն ասաց. «Մեր հայտարարությունն ուժի մեջ է մնում։ Նախագահի հեռուստաելույթից հետո, բնականաբար, հաջորդ քայլը շտապ չենք անելու։ Չենք ցանկանում «տաք հետքերով» շարժվել՝ մենք արեցինք, ինքը արեց եւ այլն։ Որոշակի ժամանակ է պետք, որ քաղաքական բոլոր ուժերը, շահագրգիռ կողմերն իրենց մոտեցումներն արտահայտեն։ Դրանից հետո «Միասնություն» դաշինքը համապատասխան որոշում կընդունի»։
ՆԱԽԱԳԱՀԸ ՍԵՊ Է ԽՐՈՒՄ
ՀԺԿ քաղաքական խորհրդի անդամ, ԱԺ պատգամավոր Արամայիս Բարսեղյանը, մեկնաբանելով նախագահ Ռոբերտ Քոչարյանի այն պնդումը, թե «Միասնության» հայտարարության նախաձեռնությունը ՀԺԿ-ինը չէր, ասաց. «Սա ընդամենը փորձ էր սեպ խրելու «Միասնություն» դաշինքի՝ ՀԺԿ-ի, ՀՀԿ-ի եւ «Երկրապահի» միջեւ։ Նման հարց չկա։ ՀԺԿ-ն ՀՀԿ-ի հետ միասնական է»։
