Խորհրդարանական քննարկումների ընթացքում «Գրանդ Տոբակոյի» հասցեին կշտամբանքներ հնչեցին, որ հումքը դրսից են բերում։ «Հայծխախոտի» եւ «Գրանդ Տոբակոյի» խոշոր բաժնետեր Ռուբեն Հայրապետյանը հերքեց այդ պնդումները ծխախոտի մասով, նշեց, որ միայն թուղթն են դրսից գնում, նաեւ քիմբամբակը, բայց ֆիլտրն արտադրում են Հայաստանում. «Իսկ արկղերը, որ «Սիլ» կոնցեռնի տնօրենին շատ է անհանգստացնում՝ այո, իրենցից չենք գնելու։ Քանի որ նրանք միանգամից են ցանկանում հարստանալ, ավելի թանկ գնով ծախել։ Այդ արկղերն ավելի էժան գնում ենք էլի Հայաստանում գործող մեկ այլ արտադրությունից, որը գոֆրոն ներմուծում է դրսից եւ հավաքում Երեւանում»։
ԱՌԱՆՁՆԱՏՈՒՆԸ ՀԱՏԿԱՑՐԵԼ Է ԿԱՌԱՎԱՐՈՒԹՅՈՒՆԸ
Ի պատասխան «Առավոտի» հարցման, թե ինչպես է Լեւոն Տեր-Պետրոսյանին հատկացվել Հրազդանի կիրճում գտնվող առանձնատունը, ՀՀ առաջին նախագահի գրասենյակից հայտնեցին, որ այդ առանձնատունը հատկացվել է Հայաստանի կառավարության 1998 թ. մայիսի 20-ի որոշմամբ, որի համար հիմք է ծառայել «ՀՀ նախագահի մասին» օրենքը։ Հիշեցնենք, որ այդ որոշումն ընդունվել էր այն ժամանակ, երբ Տեր-Պետրոսյանն արդեն 3,5 ամիս է, նախագահ չէր։
Կարդացեք նաև
Ո՞Վ ԳՆԱՑ, Ո՞Վ ՄՆԱՑ
Ըստ ԼՂՀ դատախազության, ԼՂՀ նախագահի դեմ կատարված մահափորձին առնչություն ունենալու կասկածանքով կալանքի ենթարկված անձանցից, կասկածանքը հիմնավորող տվյալների բացակայության կապակցությամբ, երեկ ազատ են արձակվել 12 հոգի: Նախաքննության ընթացքում բացահայտվել են նոր փաստեր եւ ապացույցներ, որոնց հիման վրա ձերբակալվել է եւս մեկ անձ: Դատախազությունը սակայն շարունակում է թաքուն պահել թե՛ ձերբակալվածների, թե՛ ազատ արձակվածների անունները:
