Չնայած «Ազգային միաբանության» պատգամավորները համարում էին, թե Արտաշես Գեղամյանին խմբակցության ղեկավարի պաշտոնից փոխատեղելու հարցի քննարկումը վիրավորական կլիներ իրենց 90 հազար ընտրողների համար՝ երեկ այդ հարցն այսուհանդերձ քննարկվել է «Իրավունք եւ միաբանության» նիստում։ 2 «կողմ», 4 «դեմ» ձայների արժանանալով՝ խմբակցության ղեկավարի ռոտացիայի սկզբունքը կանոնակարգում ընդգրկելու առաջարկը մերժվել է։
ՍԻՄ-ի նախագահ Հրանտ Խաչատրյանն «Առավոտին» հայտնեց, թե «Նկատի ունենալով հարցի նրբանկատությունը եւ շարունակականությունը՝ պայմանավորվել են լրացուցիչ մեկնաբանություններ չանել, մինչեւ կուսակցությունների կողմից խմբակցության որոշումների քննարկումը»։
ՀԱՐՑՈՒՊԱՏԱՍԽԱՆԻ ՆԱԽԱՊԱՏՐԱՍՏՈՒԹՅՈՒՆ
Կարդացեք նաև
Օրերս պատգամավորներից մեկը մասնավոր զրույցում ասաց, որ կառավարության հետ առաջիկա հարցուպատասխանի ժամանակ պատրաստվում է հարցնել՝ ո՞վ է Սենիկ Գեւորգյանը, ի՞նչ է նշանակում $100.000 դուրս հանել, իսկ հետո $15.000 ներդրում անել եւ այլն: Հետաքրքիր է, կհարցնի՞:
ՄԵԿ ՄԱՐՄԻՆ՝ ՉՈՐՍ ԳԼԽԱՆԻ
ԱՎՄ համագումարը վերընտրեց իր չորս համանախագահներին՝ Միհրան Մովսիսյան, Համլետ Հովսեփյան, Դիոնիս Մարգարյան, Արմեն Մազմանյան։ Ինչո՞ւ ԱՎՄ-ն չունի մեկ գլուխ. «Որովհետեւ մենք չենք հավաքվել անձերի շուրջ, մենք հավաքվել ենք մեր կանոնադրության շուրջ։ Եվ հետո, ինչո՞ւ մեկից պահանջել, պատասխանատվությունը մեկի վրա թողնել»,- մեր հարցին այսպես պատասխանեցին ԱՎՄ-ականները։
