«Ազգային միաբանության» կուսակցության ղեկավար Արտաշես Գեղամյանի կարծիքով, Անդրանիկ Մարգարյանի կառավարությունը հայտնվել է տնտեսական կոլապսի մեջ. «Եթե տնտեսությունից ոչինչ չեն հասկանում, եթե մեզ չեն լսում, գոնե տարին մեկ անգամ թող տնտեսական ամսագիր կարդան, գիրք կարդան»։ Ի վերջո, պրն Գեղամյանը պնդեց, որ «օր առաջ ներկայիս կառավարությունը պետք է հրաժարական տա»։
ՔԱՂԱՔԱԿԱՆ ՃՆՇՈՒՄ՝ ՍԵՐՄԱՑՈՒԻ՞ ՏԵՍՔՈՎ
Ֆրանսիայի եւ Հունաստանի կառավարությունները համապատասխանաբար 10 հազար եւ 6 հազար տոննա մարդասիրական օգնություն են ցուցաբերելու Հայաստանին՝ ալյուրի եւ հացահատիկի տեսքով։ Առաջիկայում էլ ԱՄՆ-ը շուրջ 30 հազար տոննա անասնակեր կմատակարարի Հայաստանին։ ՀԲ-ն էլ՝ 5 մլն դոլարին համարժեք օգնություն է ցուցաբերելու։ Բոլոր այս օգնությունները նախատեսված են աղետի գոտու համար։ Սակայն Շիրակի մարզի Պեմզաշեն եւ Հայկասար գյուղերում փոխանակ գյուղացիներին հասցնեն օգնությունը, ասել են. «Սերմացուն գնացեք եւ ստացեք Արտաշես Գեղամյանից»։ Իր՝ Արտաշես Գեղամյանի կողմից սա ապացույց է այն բանի, որ մարդասիրական օգնությունը կառավարության կողմից օգտագործվում է որպես քաղաքական ճնշում։
Կարդացեք նաև
ՀԻՇԻ՛Ր ԹՂԹԱԴՐԱՄԸ ՔՈ
Օրերս թերթերում հրապարակվեցին «Ճանաչեք ձեր թղթադրամները» վերտառությամբ 1000 դրամանոցների պատկերները։ Այս ակցիան յուրօրինակ կերպով մեկնաբանեց «Առավոտի» ընթերցողներից մեկը. «Կառավարությունն այնքան աշխատավարձ, թոշակ ու նպաստ չի վճարել, որ թերթերում է տպում թղթադրամների լուսանկարները՝ ենթադրելով, որ մարդիկ դրանց տեսքը մոռացած կլինեն»։
