Ոչ վաղ անցյալում ամենուրեք իշխող թուրքապարսկաչինական անճաշակ, ցածրորակ հագուստները տհաճություն էին պատճառում։ Բոլորն էլ ուզում են նորաձեւ երեւալ, գուցե թե հասարակությունը մեղավոր չէ։ Չէ՞ որ նրա միակ «նորաձեւության տունը» տոնավաճառն էր։ Այսօր պատկերը քիչ այլ է։ Գորշ, միօրինակ զանգվածը գունային երանգ է ստացել, զանգվածից անջատվում են անհատական ոճերը։ Մոդան մեզ մոտ դանդաղ, բայց, այնուամենայնիվ, զարգանում է։ Փորձեր են արվում հասարակությանը ներկայացնելու գեղեցիկը։ Այդ փորձերից մեկն էլ մարտի 2-ին եւ 3-ին Նկարիչների միության շենքում տեղի ունեցած RAFI նորաձեւության կենտրոնի հագուստների ցուցադրումն էր։ Ներկայացված էր դասական եվրոպական ոճը, բայց բացառված չէ, որ ապագայում Նորաձեւության կենտրոնն օգտագործի հայկական տարազի եւ ավանգարդի տարրեր։ Սա նորաստեղծ կենտրոն է, որն աշխատում է 2 ուղղությամբ՝ մոդելների դպրոց, որտեղ պոդիումի վրա քայլելու արվեստի հետ միասին կդասավանդվի խորեոգրաֆիա, մնջախաղ, կլինեն սեմինարներ եւ նորաձեւության տուն։ Այսուհետեւ պարբերաբար կկազմակերպվեն նորաձեւության ցուցադրումներ։ Մարտի 8-ին նախատեսված է Մարինե Սոխակյանի եւ եւս 3 մոդելյորների հավաքածուների ցուցադրում։
ՆԵԼԼԻ ԲԱՐՍԵՂՅԱՆ
