ՀՈՒՍԱՀԱՏՈՒԹՅԱՆ ՉԱՓՄԱՆ ՄԻՋՈՑ «Առավոտի» նամակների բաժնում թղթապանակները սովորաբար հաստափոր են լինում։ Ամենահաստափորը բոլոր ժամանակներում իրավական բաժնինն է. դատաիրավական համակարգից դժգոհություններ միշտ կան ու կլինեն։ Այլ համակարգում էլ աշխատողներն առանձնապես հրեշտակներ չեն։ Բայց երբ վերեւում ուժեղ ձեռք է լինում, ներքեւինները իսկապես աշխատում են՝ նույն ժամանակ նաեւ քաղաքացիների բողոք-նամակներին ընթացք տալով։ Եվ ոչ թե ձեւ են անում, թե աշխատում են եւ արհեստականորեն ձգձգում ցանկացած բողոք՝ քաղաքացուն ֆուտբոլի գնդակի պես այս պաշտոնյայի դռնից մյուսին «փոխանցելով»։ Այդ «ֆուտբոլի գնդակների» մեծ մասն ի վերջո հայտնվում է մամուլում, այդ թվում եւ «Առավոտում»։ Գործադիր ու դատական մարմինների հատկապես մանր չինովնիկներից դժգոհների նամակների ամենամեծ, աներեւակայելի հոսքը Անդրանիկ Մարգարյանի վարչապետությանը հաջորդած ամիսներին էր. մեր խմբագրության ամեն մի բաժին մի ալտերնատիվ նախարարության եւ վարչության էր վերածվել։ Վերջերս հանկարծ արձանագրեցինք, որ բողոքների թղթապանակը նիհարել-բարակել է. մի՞թե հայրենի կառավարությունն իր զանազան օղակներով սկսել է այնքան լավ աշխատել, որ քաղաքացիները մոռանում են մամուլի տան ճանապարհը։ Թե՞ փոստային ծառայությունն է վատ աշխատում։ Մի քանի հարցումներից պարզեցինք, որ ոչ մեկն է, ոչ՝ մյուսը։ Մարդիկ հուսահատ են եւ հոգնած՝ ամեն ինչից։ Սեփ. լր.