«ԾՆՆԴՅԱՆ ՏՈՆԸ» ԿԱՅԱՑԱՎ Արդեն 7 տարի է, ինչ «Հայ ազատամարտիկների փառքի թանգարանում» ապրիլի 5-ը նշվում է որպես զոհված ազատամարտիկների երեխաների միասնական ծննդյան օր։ Այս տարին էլ բացառություն չէր… Նախ, 1 րոպե լռությամբ ներկաները հոտնկայս հարգեցին զոհված ազատամարտիկների հիշատակը, ապա վերջիններիս երեխաները սկսեցին տոնել իրենց յուրօրինակ «ծննդյան օրը»։ Նրանք ասմունքում էին, շուտասելուկներ ու հանելուկներ առաջարկում հանդիսատեսին, «տաղիկներ» ասում… «Ֆորկա-ֆորկա» եւ «Ալելուիա» երգերը երեխաները կատարում էին մեծ բավականությամբ, հավատով ու սիրով տոգորված։ Վերջում երեխաները դիտեցին «Քաջ Նազար» բեմադրությունը, որը Պատանի հանդիսատեսի թատրոնի նվերն էր երեխաներին։ 2001թ. ապրիլի 5-ը տոնելու համար թանգարանը փետրվար ամսին ավանդական միամսյակ էր հայտարարել, խնդրելով, որ հնարավորություն ունեցողները մեկական նվեր ընծայեն երեխաներին։ Ներկայացումը դիտելուց հետո օրվա հերոսները ստացան հավաքված նվերները։ ՀՌԻՓՍԻՄԵ ԱՎԵՏԻՍՅԱՆ