«ՄԵՐ ՀԻՆ ԵՐԳԵՐԸ» Համերգաշար՝ նվիրված քրիստոնեությունը Հայաստանում պետական կրոն հռչակման 1700-ամյակին Հայ բազմաճյուղ երգի ընտրանին էր ներկայացնում 2001թ. փետրվարի 27-ից Երեւանի Կոմիտասի անվան կամերային երաժշտության տան սրահում կայացած համերգաշարը՝ «Մեր հին երգերը» խորագրով, որը բաղկացած էր հինգ մասից: Եզրափակիչ համերգը կկայանա ապրիլի 26-ին, Արամ Խաչատրյան համերգասրահում։ Համերգաշարը նվիրված է ՀՀ-ում քրիստոնեության ընդունման 1700-ամյակին։ Այն կազմակերպվել է «Երկիր եւ մշակույթ» հասարակական բարեգործական կազմակերպության նախաձեռնությամբ, Մեսրոպ արքեպիսկոպոս Աշճյանի հովանավորությամբ եւ հայրենի ճանաչված արվեստագետների մասնակցությամբ։ Հինգ համերգների ծրագրերում տեղ են գտել հայ ժողովրդական երգաստեղծության տարբեր ժանրեր ներկայացնող նմուշներ՝ ծիսական, աշուղական, քաղաքային, հոգեւոր, ազգային-հայրենասիրական եւ այլ երգեր։ Հայրենի երկրին ու մշակույթին նվիրյալ մարդկանց շնորհիվ ԵՄԿ-ն այժմ համազգային կազմակերպություն է, որ Եվրոպայում եւ Հյուսիսային Ամերիկայում իր կենտրոններն ունի։ Հայաստանում ԵՄԿ-ն պաշտոնապես գրանցվել է 1994թ. ապրիլին։ ԵՄԿ-ն իր աշխատանքները կազմակերպում է ամառային արշավանքների միջոցով, որոնց մասնակցում են սփյուռքահայ, նաեւ հայաստանցի երիտասարդներ։ Իրականացվել են բազմաթիվ ծրագրեր։ ԱԻԴԱ ՀՈՎՍԵՓՅԱՆ
