ԳՅՈՒԼԻ ՀԱՅԿԱԿԱՆ ԱՐՄԱՏՆԵՐԸ

Թուրքիայի խորհրդարանի արտաքին կապերի հանձնաժողովի՝ նախօրեին կայացած նիստում քննարկվել է հայերից ներողություն հայցելու՝ մի խումբ թուրք գիտնականների, գրողների, լրագրողների եւ ոչ կառավարական կազմակերպությունների նախաձեռնությունը:

Ինչպես հաղորդում է ԱՊԱ-ն, վկայակոչելով թուրքական մամուլը, Հանրապետական ժողովրդական կուսակցության եւ Ազգայնական շարժման կուսակցության պատգամավորներն առաջարկել են ընդունել նախաձեռնության աջակցողներին դատապարտող հայտարարություն: Այդ առաջարկի դեմ է հանդես եկել էթնիկ քրդերից կազմված Ժողովրդավարական հասարակության կուսակցությունը: Քննարկումների արդյունքում որոշվել է պատգամավորների անհատական ստորագրահավաք անցկացնել՝ նախաձեռնությունը քննադատելու նպատակով: Ընդդիմադիր Հանրապետական ժողովրդական կուսակցության անդամ, պատգամավոր Ջանան Արիթմանը նախաձեռնության հեղինակներին հայրենիքի դավաճաններ է անվանել. «Այդ փաստաթղթի ներքո ստորագրած կեղծ մտավորականները պետք է ներողություն խնդրեն Թուրքիայից»: Արիթմանը քննադատել է նաեւ նախագահ Աբդուլա Գյուլի վերաբերմունքն այդ նախաձեռնության նկատմամբ: Նրա խոսքով, նախաձեռնության հեղինակներին ոգեւորել է Գյուլի Հայաստան այցը: Բացի այդ, պատգամավորն ակնարկել է, որ երկրի նախագահի մայրն ազգությամբ հայ է: «Մենք տեսնում ենք, որ նախագահը պաշտպանում է այդ նախաձեռնությունը: Աբդուլա Գյուլը պետք է ոչ թե իր էթնիկ արմատների հետեւորդը լինի, այլ ողջ թուրք ազգի նախագահը: Պարզեք նախագահի էթնիկ արմատները մոր կողմից, եւ ինքներդ կհամոզվեք»: