Արդեն մի քանի օր Ռումինիայի մայրաքաղաք Բուխարեստում ընթացող ծանրամարտի Եվրոպայի առաջնությունում Հայաստանի ազգային հավաքականը մրցապայքարն սկսեց երեկ՝ տղամարդկանց մինչեւ 69 կգ քաշային կարգում: Ու այն պսակվեց ոսկե մեդալով: Մեր երկրին հաղթանակ բերեց Առաքել Միրզոյանը՝ օլիմպիական խաղերի չեմպիոն Հոկսեն Միրզոյանի որդին: Նա երկամարտում ցույց տվեց 336 կգ արդյունք: Առաքելը փոքր «ոսկու» արժանացավ նաեւ պոկում վարժությունում՝ 151 կգ, իսկ հրումում սանձելով 185 կգ ծանրաձողը՝ արժանացավ այդ մրցաձեւում Եվրոպայի առաջնության արծաթե մեդալին:
Ցավոք, այս քաշային կարգում մեր երկրորդ մասնակիցը՝ Գեւորգ Կակոյանը, հրում վարժությունում ստացավ զրո միավոր եւ զրկվեց բարձր տեղերի համար պայքարելու հեռանկարից:
