![\"\"](\"https://www.aravot.am/2009/aravot_arm/April/10/p1.jpg\")
«Ժառանգություն» խմբակցության ղեկավար Արմեն Մարտիրոսյանը «Փաստարկ» ակումբում հայտարարել է, որ Րաֆֆի Հովհաննիսյանը, համաձայն իր դիմումի, ԵԽԽՎ Հայաստանի խորհրդարանի պատվիրակության կազմում իր տեղը զիջել է խմբակցության անդամ Զարուհի Փոստանջյանին, իսկ ՆԱՏՕ խորհրդարանական վեհաժողովի Հայաստանի պատվիրակության կազմում՝ Ստեփան Սաֆարյանին: Խմբակցության ղեկավարն այդ մասին արդեն տեղյակ է պահել ԱԺ նախագահ Հովիկ Աբրահամյանին: «Ժառանգության» ներկայացուցիչ Հովսեփ Խուրշուդյանն ասել է, որ կուսակցության առաջնորդի այդ քայլը դեռեւս նախորդ տարի հունիսին նրա արած այն հայտարարության շարունակությունն է, որ ինքը չի մասնակցի ԵԽԽՎ լիագումար նիստերին, քանի դեռ Եվրոպան եւ Հայաստանը չեն համապատասխանում եվրոպական չափանիշներին, եւ Հայաստանը չի կատարում ԵԽԽՎ առաջ ստանձնած պարտավորությունները: Ըստ Հովսեփ Խուրշուդյանի՝ Րաֆֆի Հովհաննիսյանն ասել է, որ ընդդիմությունը պետք է ձայն ունենա լիագումար նիստերում եւս, եւ այդ իսկ պատճառով էլ զիջել է իր տեղը:
