«Ջիհան» գործակալությունը հաղորդում է, որ Թուրքիայի ուշուի ֆեդերացիան հրաժարվել է մասնակցել ապրիլի 24-26-ը Հայաստանում կայանալիք միջազգային մրցաշարին: Հարեւան երկրի ուշուի ֆեդերացիայի նախագահ Էբուբեքիր Հոջաօղլուն հայտարարել է, որ իրենք հրաժարվում են Երեւան ժամանել, քանի որ, իրենց կարծիքով, ճիշտ չէ մասնակցել մրցապայքարին այն ժամանակ, երբ Հայաստանում ոգեկոչում են Հայոց ցեղասպանության զոհերի հիշատակը:
«Մենք դեմ ենք, որպեսզի սպորտն օգտագործվի քաղաքական նպատակների համար»,- հայտարարել է Հոջաօղլուն: Ավելի վաղ թուրքական կողմը համաձայնել էր մասնակցել մրցմանը, սակայն այն ժամանակ ժամկետներն այլ էին՝ ապրիլի 18-19-ը: «Ջիհան» գործակալությունը, վկայակոչելով ադրբեջանական «Day.az»-ը, նշում է, որ Ադրբեջանի ուշուի ֆեդերացիայի նախագահ Ազեր Հասանովը նամակ է գրել իր թուրք գործընկերոջը եւ հորդորել չմասնակցել երեւանյան մրցաշարին:
