![\"\"](\"https://www.aravot.am/2009/aravot_arm/June/10/p13.jpg\")
«Վերվարածներն ընտանիքում», «Որոգայթ-1», «Կյանքի գինը» հեռուստասերիալներում «լավ տղայի» դերեր խաղացող Արտավազդ Առաքելյանի (հայտնի է «Ծյոմ Յուժնի» մականունով) հետ հանդիպմանս պատճառը հունիսի 27-ին Մարզահամերգային համալիրում կայանալիք նրա համերգն էր:
– Արտավազդ, համալիրում քեզնից առաջ Արմենչիկի մենահամերգն է լինելու: Քեզ չի՞ վախեցնում այն, որ նրա տոմսերն արդեն սպառված են: Ինչպե՞ս ես «լցնելու» դահլիճը:
– Արմենչիկին լսողներն այլ են, իմ ունկնդիրները՝ այլ: Մեկը մյուսին չի խանգարի:
– Ովքե՞ր են քեզ լսում:
– Ուժեղ տղերքը, կյանքը ճիշտ հասկացող մարդիկ…
– Ուժեղ աղջիկները չե՞ն գալու:
– Խելացի աղջիկները, ռոմանտիկ, մի քիչ կյանքը սիրողները կգան իմ համերգին:
– Ի՞նչ երգեր են լինելու, ի՞նչ ես երգելու:
![\"\"](\"https://www.aravot.am/2009/aravot_arm/June/10/p12.jpg\")
– Հիմնականում դաստիարակչական համերգ է լինելու: Ջահելների համար գրածս սիրային երգերն եմ երգելու: Կերգեմ նաեւ ռուս բանտերգության դեմքերից մեկի՝ բարեգործական մենահամերգից հետո դաժանորեն սպանված Միխայիլ Կրուգի երգացանկից: «Բուտիրկա» խմբի երգացանկից…Կրուգն իր խոսքն ունի, նրա երգերն իր նման կենդանի են: Բազմաթիվ անակնկալներ են սպասվում: Երգելու եմ քրոջս հետ:
– Արտյոմ, իրականում մենք շփվում ենք իրական դատապարտյալների հետ, ոչ՝ սերիալային: Բանտային արվեստն ընկալելի է ազատազրկվածների համար: Ինչպես նախկինում, երբ դու էիր ազատազրկված: Արդյոք, կընկալվի՞ քո երգացանկը ազատության մեջ գտնվողների համար: Համերգը հնարավո՞ր է տխրեցնի մեզ:
– Տխուր երգերը քիչ են: Ընտրել եմ երգեր, որի տակ նրանք կպարեն էլ: Հաստատ չենք թողնելու, որ մարդիկ տխրեն:
– «Կյանքի գինը» հեռուստասերիալում չես երեւում: Ինչո՞ւ:
– Դադար եմ վերցրել, որպեսզի համերգին նախապատրաստվեմ: Նկարահանումներից հոգնել եմ: Կհանգստանամ ու նորից կնկարվեմ:
– «Որոգայթում» քո կերպավորած կերպարը՝ Տիկոն, սիրելի էր: «Կյանքի գինը» սերիալում քո կերպարի տակ դաժան, հանցագործ մարդն է, ոչ մի բանի առաջ չկանգնող: Քեզ չե՞ն կաշկանդում երկու տարբեր դերերը…
– Ավելի շատ են սիրում: Ժողովուրդը գիտի, որ ես դեր եմ խաղում:
Գագիկ Մխիթարյանը, որը Արտավազդ Առաքելյանի պրոդյուսերն է, «Վաղարշապատ» հեռուստաընկերության ռեժիսորն է, հավելում է.
– «Ծյոմին» իրոք սիրում է ժողովուրդը: Մենք աշխատում ենք, որ իրեն ավելի շատ ճանաչեն որպես երգիչ, ոչ որպես դերասան: Նա իր ներսով, իր աշխարհով երգիչ է: Արդեն կան առաջարկներ: Իր կողքը լինելու առաքելությունս այն է, որ նրան ներկայացնեմ երգիչ: Ես էլ եմ դերասան, սակայն «Ծյոմին» բոլորը գիտեն, նա առաջիններից մեկն է: Նա իդեալական կերպար է, եւ ամեն ինչ անում ենք, որ նրա կերպարը չխամրի:
– Անհատապես ովքե՞ր են շփվում ձեզ հետ:
– Քաղաքական գործիչները, հանցագործները…
Արտավազդ Առաքելյանը հավելեց, որ համերգից հետո կայցելեն ազատազրկման վայրեր: Եվ քանի որ կրթությունը ռուսական է, մշակութային պաշարը՝ ռուսական, երազում է ռուսական սերիալներում նկարահանվելու մասին: