Թուրքական հեռուստատեսության եթեր է դուրս գալիս հեռուստախաղ՝ «Խոստովանահայրերի մրցույթ», որի մասնակիցներն իմամներ, րաբբիներ, քրիստոնյա հոգեւորականներ եւ բուդդայական վանականներ են: Guardian-ը նշում է, որ մրցողների խնդիրը համոզված աթեիստներին իրենց հավատին դարձնելն է: Հաղորդման յուրաքանչյուր թողարկման ընթացքում մասնակիցները կխոսեն 10 աթեիստներից մեկի հետ: Համոզվողները կշահեն գլխավոր մրցանակ՝ ուղեւորություն նոր կրոնի սրբավայրեր. մահմեդականները կմեկնեն Մեքքա, հուդայականները եւ քրիստոնյաները՝ Երուսաղեմ, բուդդայականները՝ Տիբեթ:
Հաղորդման հեղինակները հուսով են, որ հաղորդաշարը հեռուստադիտողներին հնարավորություն կտա ավելի շատ բան իմանալ կրոնի մասին: «Նախագծի նպատակն անհավատին դեպի Աստված դարձնելն է»,- հայտնել է Kanal T հեռուստաընկերության փոխտնօրեն Ահմեդ Յոզդեմիրը: Հաղորդման գովազդում ասվում է, որ մասնակից աթեիստները հնարավորություն կստանան «շահել ամենամեծ մրցանակը՝ հավատ առ Աստված»: