Ռուսաստանի ջավախահայերի համայնքի տարածած տեղեկությունների համաձայն, Ռուսաստանի ջավախահայերի համայնքը Վրաստանի իշխանություններին կոչ է անում նոր կառավարական ռազմավարությունը կիրառել Սամցխե-Ջավախք-Ծալկա տարածաշրջանի օրինակով: Տարեսկզբին Վրաստանի կառավարությունը հաստատել է Աբխազիայի եւ Հարավային Օսիայի նկատմամբ միասնական ռազմավարությունը: Փաստաթուղթը նախատեսում է հակամարտության կարգավորման բացառապես խաղաղ եղանակներ՝ ներդրումների ներգրավման ճանապարհով, կոչվում է «Մասնակցություն համագործակցության ճանապարհով»: Աբխազական եւ հարավօսական կողմերը բացասաբար են ընդունել վրացական ռազմավարությունը: Իսկ Ռուսաստանի ջավախահայերի համայնքի տարածած հայտարարության մեջ ասվում է. «Հաշվի առնելով ծագած իրավիճակը՝ Ռուսաստանի ջավախահայերի համայնքը Վրաստանի իշխանություններին կոչ է անում առաջարկվող փաստաթղթում նախատեսված ռազմավարությունը գործնականում կիրառել Սամցխե-Ջավախք-Ծալկա հայաբնակ տարածաշրջանի նկատմամբ: Ռուսաստանի ջավախահայերի համայնքը համոզված է, որ ներդնելով փաստաթղթում նախատեսված գործողությունների ծրագիրը, Վրաստանի իշխանությունները միջազգային հանրությանն ակնբախորեն կցուցադրեն այն մոդելը, որն առաջարկվում է Աբխազիայի եւ Հարավային Օսիայի բնակչությանը»:
