Տայպեում մեկնարկած ուսանող մարզիկների ծանրամարտի աշխարհի երկրորդ առաջնությունում Հայաստանը հանդես է գալիս երեք տղաներով: Ըստ առաջնության պաշտոնական կայքէջի, մեր երկրից առաջինը մրցահարթակ մտած 62 կգ քաշային Ռուբիկ Մամոյանը պոկում վարժությունում 140 կգ արդյունքով գերազանցել է բոլոր մրցակիցներին եւ ստանձնել առաջատարի դերը: Սակայն հրումում հայ ծանրորդը երեք անգամ ձախողել է մոտեցումները 140 կիլոգրամին եւ անմասն մնացել երկամարտում խաղարկված մեդալներից:
Գերազանց մրցելույթ է ունեցել 77 կգ քաշային Աղասի Աղասյանը, որը, մեր ունեցած տեղեկություններով՝ երկու մրցաձեւերում եւ երկամարտում բարձրացել է պատվո պատվանդանի հաղթողի աստիճանին: Սակայն երեկ երեկոյան առաջնության կայքէջում այս քաշային կարգի ներկայացուցիչների արդյունքները դեռ զետեղված չէին:
Վաղը Հայաստանի վերջին պատվիրակի՝ 94 կգ քաշային Վարդան Դավթյանի հերթն է, ում հետ եւս մեր մասնագետները հույսեր են կապում:
