![\"\"](\"https://www.aravot.am/2010/aravot_arm/July/7/p4.jpg\")
«Հայաստան» համահայկական հիմնադրամը տեղեկացնում է, որ Տավուշի մարզի Ակնաղբյուր գյուղում բացվել է նորակառույց համայնքային կենտրոնը: Շուրջ 60 միլիոն ՀՀ դրամ արժողությամբ այս ծրագիրը ֆինանսավորել է Հիմնադրամի Ֆրանսիայի տեղական մարմինը:
Արարողությանը ներկա են եղել ինչպես «Հայաստան» համահայկական հիմնադրամի եւ Տավուշի մարզպետարանի ներկայացուցիչներ, այնպես էլ Ֆրանսիայից ժամանած շուրջ 50 հոգանոց բարերարների պատվիրակությունը՝ ծրագրի բարերար Ջորջ Թավիդյանն իր տիկնոջ հետ: Թավիդյանների ընտանիքը «Հայաստան» համահայկական հիմնադրամի նվիրատու անդամ է:
Երկհարկանի համայնքային կենտրոնում այսուհետեւ կգործեն գյուղապետարանը, համայնքային գրադարանը, 50 հոգու համար նախատեսված հանդիսությունների սրահը, ինչպես նաեւ առանձին մուտքով բուժկետը:
Համայնքային կենտրոնի բացումը մեծ ձեռքբերում է բնակչության կյանքում, քանի որ տարիներ շարունակ գյուղապետարանը գործում էր երկհարկանի խարխուլ շենքում, որտեղ առ այսօր էլ ապաստանում է փախստականների երկու ընտանիք, գյուղն ընդհանրապես չուներ հանդիսությունների սրահ, գրադարանը տեղակայված էր կիսակառույց խոնավ շենքում, իսկ բուժկետը՝ մետաղե տնակում:
