Գերմանական Սաքսոնիա-Անխալտ մարզի ոստիկանությունը քննում է ճանապարհատրանսպորտային մի պատահար, որի արդյունքում երկու մարդ է մահացել: Այդ մասին տեղեկացնում է The Local. պարբերականը:
Դեպքը տեղի է ունեցել նախորդ կիրակի՝ հուլիսի 4-ին, սակայն դրա մանրամասները միայն երեկ են ի հայտ եկել:
Դոլլե համայնքում երկու մեքենաների դիմահար հարվածի արդյունքում մահացել են երկու վարորդներն էլ՝ 27-ամյա մի կին եւ 59-ամյա ոստիկանը՝ Մագդեբուրգ քաղաքից: Մեքենաներից ոչ մեկի սրահում ուղեւոր չի եղել: Սակայն ավելի ուշ, երբ ուսումնասիրել են մեքենաները, ոստիկանի մեքենայի բեռնախցիկում հայտնաբերվել է մերկ կնոջ դիակ:
Հետաքննության վարկածով՝ դա վարորդ-ոստիկանի կնոջ դին էր: Ըստ ոստիկանների՝ մեքենաների բախման պահին կինն արդեն իսկ մահացած էր: Դիակի մերկ մարմնի վրա եղել են բռնությունների բազմաթիվ հետքեր: Ինչպես հայտնում են իրավապահները՝ մոտ ժամանակներս կհրապարակվեն փորձաքննության արդյունքները, որոնցից պարզ կդառնա՝ երբ եւ ինչից է մահացել այդ կինը, եւ նա իսկապե՞ս ոստիկանի կինն էր:
