Ֆրանսիայի կամավորները՝ կրկին Գեղարքունիքի մարզում

2009 թվականի օգոստոսի 8-ին տեղեկացրել ենք, որ արդեն երրորդ ամառն է, որ Գեղարքունիքի մարզի Լճափ գյուղ են գալիս Փարիզի «CSOE»՝ «Որբերի եւ ուսանողների օգնության կոմիտե» բարեգործական կազմակերպության կամավորները եւ որոշակի աշխատանքներ իրականացնում. նորոգում համայնքի միջնակարգ դպրոցը եւ մանկապարտեզը։ Կամավորների մեջ կան նաեւ հայեր, նախորդ տարիներին նրանք աջակցել են Երեւանի 19 մանկապարտեզների եւ Գյումրիի դպրոցներին: Բացի շինարարական աշխատանքներից, կամավորները գյուղի երեխաների համար դպրոցում կազմակերպում են ճամբար՝ նրանց հետ անցկացնում են իրենց օրվա ազատ մասը, երեխաներին սովորեցնում են խոսել ֆրանսերեն։
Այս ամռանը «Որբերի եւ ուսանողների օգնության կոմիտե» բարեգործական կազմակերպության կամավորները չորրորդ անգամ են գալիս Հայաստան ու կրկին Լճափում են: Եկել է 20 կամավոր, որից 8-ը՝ հայ: Երիտասարդները կրկին աշխատելու են դպրոցը բարեկարգելու ուղղությամբ. նախատեսում են վերանորոգել դպրոցի 1 դասասենյակ, փոխել 3 դասասենյակների պատուհանները եւ դպրոցի մուտքի դուռը: Այս աշխատանքների համար անհրաժեշտ գումարը ուսանողների մերձավորներն են հանգանակել:
Գեղարքունիքի մարզպետարանից տեղեկացանք, որ մարզպետ Նվեր Պողոսյանը հանդիպել է կամավորներին եւ խոստացել անհրաժեշտության դեպքում աջակցել նրանց: Մարզպետարանն էլ կամավորների համար պարբերաբար կկազմակերպի ճանաչողական այցեր՝ մարզի պատմամշակութային վայրեր: