Այս անգամ արդեն AIBA-ի թեթեւ ձեռքով նման վիճակում հայտնվել է բռնցքամարտի Հայաստանի ազգային հավաքականը: Սիրողական բռնցքամարտի միջազգային ֆեդերացիան վերջերս Մարոկոյում կայացած գործկոմի նիստում որոշել է 2011 թ. աշխարհի առաջնությունն անցկացնել սեպտեմբերին՝ Բաքվում: 2011-ը նախաօլիմպիական տարի է եւ աշխարհի առաջնությունում մեդալներից բացի խաղարկվում են նաեւ Լոնդոնի օլիմպիական խաղերի ուղեգրեր: Իսկ կանոնակարգի համաձայն այն երկիրը, որը չի մասնակցի աշխարհի առաջնությանը, զրկվում է օլիմպիական ուղեգրերից:
Նախապես որոշված էր, որ աշխարհի ուժեղագույն բռնցքամարտիկներին ընդունելու է Հյուսիսային Կորեան: Սակայն երկրում ներքաղաքական անկայուն վիճակի պատճառով այդ երկիրը հրաժարվել է կազմակերպիչ երկրի պարտականություններից: Բացի Բաքվից առաջնությունն ընդունելու ցանկություն հայտնել էին նաեւ Հայաստանը, Լեհաստանը, Թուրքիան եւ Իռլանդիան:
Թե ի՞նչ դիրքորոշում ունի Հայաստանի բռնցքամարտի ֆեդերացիան, դեռ վերջնականապես պարզ չէ: Բայց հայտնի է, որ մեր ֆեդերացիան մտադիր է եկող տարի եվրոպական վարկանիշային մի մրցում Երեւանում անցկացնելու հայտ ներկայացնել: