«Առավոտը» ժամանակին անդրադարձել է հակասոցիալական վարք ունեցող երեխաների թիվ 18 հատուկ դպրոցին, որը ԿԳն-ն ցանկանում էր փակել: Այդ քաղաքականությունը շարունակվում է մինչ այժմ: Lragir.am-ի թղթակցի հետ զրույցում երեկ ԿԳն հանրակրթության վարչության պետ Նարինե Հովհաննիսյանը հայտարարել է. «Հիմա շարունակվում է 24 հատուկ դպրոցների գնահատումը: Ինչ վերաբերում է թիվ 18 հատուկ դպրոցին, որը նախատեսված է հակասոցիալական վարք դրսեւորած երեխաների կրթությունն իրականացնելու համար, ապա խիստ զարմանալի է 1-6-րդ դասարանցիների առկայությունը այս կրթօջախում: Այստեղ սովորում են սոցիալապես անապահով երեխաներ, որոնք, որպես կատեգորիա, օրենքով սահմանված չեն, ուստի այսօր Հայաստանում այդ կատեգորիայի գիշերօթիկ դպրոց չպետք է լինի: Թիվ 18 հատուկ դպրոցի 70 սաներից հազիվ 10-ը վարքի շեղում ունեցող երեխաներ լինեն»:
