Օրերս կայացել է ֆուտբոլի Հայաստանի առաջնության բարձրագույն խմբում ծայրաստիճան անհաջող հանդես եկող Գյումրիի «Շիրակ» ֆուտբոլային ակումբի հիմնադիր ժողովը, որում հայտարարվել է ակումբում մոտ ժամանակներս կատարվելիք բարեփոխումների ու դրան հետեւող դրական տեղաշարժերի ակնկալիքների մասին: Այս տեղեկատվությունը հրապարակել է armfootball.com-ը եւ շարունակել, որ ակումբի գործադիր տնօրեն Անդրանիկ Ադամյանը թղթակցին տված իր հարցազրույցում ասել է, թե մի քանի հարցերի ճշգրտումից հետո, մոտ օրերս կհայտարարվի բարեփոխումների մանրամասների մասին: Իսկ «Շիրակի» գլխավոր մարզիչ Վարդան Բիչախչյանը տեղեկացրել է, որ այս պահին թիմում փորձաշրջան են անցնում Ախալցխայից հրավիրված երկու ֆուտբոլիստներ՝ դարպասապահ եւ կիսապաշտպան, (նրանց անունները, սակայն, չեն հրապարակվում), որոնք իրենց վատ չեն դրսեւորում եւ հնարավոր է՝ նրանց հետ պայմանագիր ստորագրվի:
Armfootball-ը գրում է, որ սա առաջին անգամ է, որ Գյումրիի ամենատիտղոսավոր թիմը՝ ձգձգվող մարզական ճգնաժամից դուրս գալու համար, համալրվում է լեգեոներական ֆուտբոլիստներով:
