Ռեգբիի տարատեսակներից մեկի՝ «Ռեգբի լիգ»-ի Ավստրալիայի ստորին դիվիզիոններից մեկի առաջնության մասնակից «Չաֆֆի Տայտենս» ակումբի խաղացող Կավա Լումանովաոն խաղադաշտում մրցակցի վրա դանակով հարձակվելու համար ցմահ որակազրկվել է:
26-ամյա մարզիկն այսուհետեւ ոչ միայն ռեգբի խաղալու, այլեւ Ավստրալիայի Վիկտորիա նահանգում անցկացվող մարզաձեւի որեւէ հանդիպման անգամ որպես հանդիսատես ներկա գտնվելու իրավունք չունի: Որակազրկման պատճառ հանդիսացել է «Թայգերս» թիմի հետ խաղում ծագած քաշքշուկը, որի ժամանակ Լումանովաոն դաշտից հեռանալով՝ գնացել ու իր մեքենայից վերցրել է դանակը եւ վերադարձել իրեն «նեղացնողին» պատժելու համար: Նրան զինաթափել հաջողվել է միայն իր թիմի մարզչին: Թեեւ ոչ ոք այդ ընթացքում չի տուժել, սակայն խաղը դադարեցվել է եւ հաղթանակ գրանցվել «Թայգերսի» օգտին:
