Ռուսական երաշտը ազդել է Հայաստանում իրականացվող «Դպրոցական սնունդ» ծրագրի վրա: ՄԱԿ-ի Պարենի համաշխարհային ծրագիրը պատրաստվում էր դպրոցական սնունդ ծրագիր սկսել Արագածոտնում եւ Արմավիրում՝ ընդհանուր հաշվով շուրջ 700 դպրոցների տարրական դասարաններում սովորող 50.000 երեխաների համար: Ծրագիրը, «Ա1+»-ի փոխանցմամբ, նախատեսված էր սկսել այս տարվա սեպտեմբերի 1-ից:
Ինչպես նշվում է ՊՀԾ մամուլի հաղորդագրության մեջ, «Ռուսաստանում տեղի ունեցած խիստ երաշտի եւ այդ առնչությամբ նախագահ Պուտինի կողմից այդ երկրից հացահատկի ներկրումների նկատմամբ դրված արգելանքի առնչությամբ 50.000 դպրոցականի համար դպրոցական սնունդ կազմակերպելու ՊՀԾ հայաստանյան ծրագրի նախնական պլանը փոխվեց»:
Ներկայիս դրությամբ ծրագիրը հնարավոր է սկսել միայն 12 000 երեխայի համար՝ օգտագործելով ՊՀԾ-ի՝ Հայաստանում եղած սննդի պաշարները: Ծրագիրը շուտով կմեկնարկի Տավուշի եւ Գեղարքունիքի մարզերում, իսկ մինչեւ տարեվերջ երեխաների թիվը կհասցվի պլանավորված 50 000-ին:
