Անթալիայում ընթացող ծանրամարտի աշխարհի առաջնությունում երեկվանից պայքարի մեջ ներգրավվեց մեր ծանր հրետանին: Ընդհանրապես, հայ ծանրորդների մրցելույթները մեծ հետաքրքրություն են առաջացնում ինչպես Հայաստանում, այնպես էլ այլ երկրներում բնակվող մեր հայրենակիցների շրջանում: Մասնավորապես, տողերիս հեղինակին օրերս զանգեց Ախթալայի քաղաքապետը եւ իր ու համաքաղաքացիների անունից ջերմ բարեմաղթանքներ հղեց հայ ծանրորդներին: Մեր մարզիկներին տեղում աջակցելու նպատակով Մոսկվայից Անթալիա է ժամանել մարզասերների 22 հոգանոց մի խումբ: Նրանց են միանալու նաեւ այստեղ հանգստացող մեր հայրենակիցները:
Իհարկե, երկրպագուների ներկայությունն ու աջակցությունը դրական լիցքեր են հաղորդում մարզիկներին, այն էլ՝ արտասահմանում: Սակայն դա հղի է նաեւ բացասական հետեւանքներով, եթե մարզասերն իր ավելորդ ակտիվ ներկայությամբ խանգարի ծանրորդների մարզումներին, օրվա ռեժիմին, մրցահարթակում ծանրաձողի եւ մրցակիցների հետ պայքարին տրամադրվելուն: Այդ իսկ պատճառով Հայաստանի ծանրամարտի ֆեդերացիայի նախագահ Սամվել Խաչատրյանը մարզիչներին եւ մարզիկներին խստագույնս արգելել է մինչեւ մրցման ավարտը ցանկացած շփում մարզասերների հետ՝ վերջիններիս էլ բացատրել այդ շփումների վնասաբերությունը եւ հորդորել այդ ամենը հետաձգել մինչեւ տվյալ ծանրորդի մրցելույթի ավարտը:
