«ՎիվաՍել-ՄՏՍ»-ի գլխամասային շենքում հանրապետության տարբեր հանրակրթական դպրոցներից սաներ հյուրընկալելն ավանդույթ է դարձել: Հերթական ընդունելության արդյունքում ՏՏ ոլորտի զարգացման հեռանկարների մասին եզրակացություն կատարելու հնարավորություն են ունեցել մայրաքաղաքի թիվ 170 ավագ դպրոցի սաները: «Հանրակրթական դպրոցներում սովորողների մեծ մասն ապագա մասնագիտության հարցում կողմնորոշվում է կամ տրված խորհուրդներին հետեւելով, կամ պատահական ընտրությամբ: Կարեւոր դեր է կատարում նաեւ նախասիրությունը: Այդ ճանապարհն առավել դյուրին դարձնելու հարցում էական դեր կարող է ունենալ ուսումնառության տարիներին տարբեր ոլորտներում գործող ընկերությունների հետ համագործակցությունը: Որպես կանոն, ամենաճիշտ տպավորությունը ստեղծվում է տեղում՝ սեփական բացահայտումների միջոցով: «ՎիվաՍել-ՄՏՍ»-ը կողմնակից է կրթության հետ համագործակցության այս մոդելին՝ վստահ լինելով, որ էապես կարող է նպաստել աշխատաշուկայի առավել արդյունավետ ձեւավորմանն ու պահանջարկից բխող մասնագետների պատրաստմանը»,- աշակերտներին ասել է ընկերության գլխավոր տնօրեն Ռալֆ Յիրիկյանը: Տարբեր վարչությունների աշխատանքին ծանոթանալուց հետո, «ՎիվաՍել-ՄՏՍ»-ի պատանի հյուրերն իրենց տպավորություններն ամբողջացրել են գլխավոր տնօրենի հետ հարցուպատասխանի ընթացքում:
