Այսօր «Մոսկվա» կինոթատրոնում կայացավ «Վերածնվիր Ճապոնիա» բարեգործական նախագծի շնորհանդեսը: Հեղինակն է կոմպոզիտոր եւ երաժշտագետ Շուշան Սարգսյանը, ով երկար տարիներ ապրելով եւ ստեղծագործելով Ուկրաինայում, վերջերս է տեղափոխվել Հայաստան: Նա մտադիր է իրականացնել բարեգործական նախագծեր: Շ. Սարգսյանը «Վերածնվիր Ճապոնիա» երգի երաժշտության հեղինակն է: Բարեգործական նախագծեր իրականացնելու մտահղացումը ծնվել է Ճապոնիայի ավերիչ երկրաշարժի օրը:
«Այն ցավը, որ ապրել էի ութ տարեկանում` Սպիտակի երկրաշարժի ժամանակ, ասես կրկին արթնացավ մեջս: Դրանից հետո ոչ ոքի հետ չկարողացա խոսել, մտա սենյակս, եւ մի քանի րոպեից արդեն պատրաստ էր երգի երաժշտությունը: Նույն օրը երեկոյան զանգեցի Իննա Մկրտչյանին եւ խնդրեցի գրել անգլերեն խոսքերը: Գործիքավորումն էլ կատարել է Դավիթ Դավթյանը»,- պատմեց Շուշանը:
Առաջիկայում տեղի կունենան մի շարք բարեգործական ակցիաներ, որոնց ողջ հասույթը կփոխանցվի Ճապոնիա` աղետի գոտի: Առաջին ակցիան տեղի ունեցավ երգի տեսահոլովակի պրեմիերայի օրը: Aleqis Accessories բրենդի նկարիչ մոդելավորող եւ ոճաբան Արմինե Գեւորգյանը ներկայացրեց իր աքսեսուարների նոր հավաքածուն, որի վաճառքից ստացած ողջ հասույթը կփոխանցվի Ճապոնիայի արվեստի դպրոցներից մեկին: Զարդերի համար օգտագործված նյութերը բազմազան էին` բնական կաշի, քարեր, փետուրներ, բյուրեղներ եւ այլն:
Մարի Խաչատրյան
