Փողոցում կրոնական կազմակերպությունների կողմից իրականացվող քարոզչությունները հոգեորսություն չեն համարվում. այսօր «Արմատ» ակումբում հայտարարեց տեր Եսայի քահանա Արթենյանը` նշելով, որ օրենքում բացեր կան, եւ դա ինքը հասկացել է «Եհովայի վկաներ» կազմակերպության անդամի դեմ դատավարությունից: Ըստ նրա, պատճառներից մեկը. «Այսպես կոչված՝ շատ եվրոպամետ ուժեր փորձում են համոզել հասարակությանը, որ հոգեորսությունը իրավական տերմին չէ: Այնինչ՝ մեզ համար դժվար է հոգեորսությունը սահմանել որպես իրավական եզր եւ շրջանառել»:
Քահանայի խոսքերով, մինչեւ «Եհովայի վկաներ» կազմակերպության անդամին դատի տալը, նույն այդ կազմակերպությունից ամեն օր առնվազն երկու անդամ եկեղեցու բակում հերթապահում էր` հոգիներ որսալու համար. «Բայց վերջին աղմուկից հետո նրանք անհետացել; են: Մեծ տրամաբանական միտք պետք չէ, որ հասկանանք, թե հավատացյալներին իրենց շարքերը քաշելու փորձեր էին»: Ասուլիսին ներկա իրավապաշտպան Վարդուհի Էլբակյանն էլ ասաց, թե օրենքով հոգեորսությունն արգելվում է, բայց չի կոնկրետացվում` ինչ է հոգեորսությունը: Նրա խոսքերով, հստակեցնելու համար դեռ քննարկումներ են ընթանում. «Քննարկումների արդյունքում էլ դեռ վերջնական ձեւակերպում չունենք: Նույն օրենքի հաջորդ հոդվածով կրոնական կազմակերպություններին թույլատրվում է քարոզել մանկապարտեզներում, ծերանոցներում եւ հիվանդանոցներում` հասարակության խոցելի շերտերին, ինչը համարում եմ հոգեորսություն»:
Արփինե ՍԻՄՈՆՅԱՆ
