Այս կարմիր վրանն էլ Իջեւանում է տեղադրված:
«Ընտրական իրավունքի պաշտպանություն» նախաձեռնությունը մայրաքաղաքում եւս սկսել է ակտիվորեն իրազեկել ընտրողին, որ ինքը պետք է տեր կանգնի իր ձայնին, եւ որ քվեն ուժ է: Մայրաքաղաքի Մալաթիա-Սեբաստիա համայնքում, զորավար Անդրանիկի արձանին հարող այգում, դաշնակցական քարոզիչներին այսօր թաղապետարանի աշխատակիցները չեն թույլատրել փոքրիկ սեղան տեղադրել: «Ավելի ցիվիլ կլինի, չէ՞, որ մի տաղավար դնենք, կանգնենք, մարդիկ էլ կմոտենան-կհետաքրքրվեն: Թե չէ, մեզ հավատացյալի տեղ են դնում: Թաղապետարանի աշխատողն ասում է՝ սեղանը հանի՝,ձեռքերիդ վրա դիր թղթերդ ու ման արի: Ո՞վ էր զանգել, ինչի՞…»,- Aravot.am-ին ասաց ՀՅԴ «Գարեգին Նժդեհ» կոմիտեի ներկայացուցիչ Գառնիկ Մեխակյանը՝ հավելելով, որ քաղաքային իշխանությունները «կանխարգելիչ միջոցառումներ» են իրականացնում՝ խոչընդոտելու համար իրենց աշխատանքները: Ըստ մեր զրուցակցի, ՀՅԴ գերագույն մարմինը դիմել է Երեւանի քաղաքապետարան, որպեսզի թույլտվություն ստանան տաղավարներ տեղադրել մայրաքաղաքի տարբեր այգիներում, կանգառամերձ տարածքներում՝ արեւից ու անձրեւից պաշտպանվելով քարոզչություն իրականացնելու համար: Քաղաքապետարանը, սակայն, չի թույլատրել:
Ամեն դեպքում, դաշնակցական քարոզիչները որոշել են չընկրկել, չընկճվել եւ շարունակեն բարձրացնել հանրության ինքնագիտակցությունը:
Նելլի ԳՐԻԳՈՐՅԱՆ
Կարդացեք նաև
TAGS- ՀՅԴ, քվեն ուժ է, «Ընտրական իրավունքի պաշտպանություն», քաղաքապետարան
