Այս տարվա առաջին 5 ամիսներին անչափահասների կողմից 128 հանցագործություն է գրանցվել, ինչը նախորդ տարվա նույն ժամանակահատվածի համեմատ նվազել է 41 դեպքով: Անչափահասների կողմից ամենատարածված հանցագործությունը գողությունն է:
Այս տարվա 1-ին 5 ամիսներին արդեն 56 դեպք է գրանցվել, մարմնական վնասվածք հասցնելու՝ 14, անօրինական զենք կրելու՝ 7 , իսկ թմրանյութ օգտագործելու 1 դեպք է գրանցվել: Այս մասին այսօր ասուլիսի ժամանակ ասաց ՀՀ ոստիկանության Քրեական հետախուզության երրորդ վարչության պետի տեղակալ Նելլի Դուրյանը: Նրա խոսքերով, միայն հունիսին անչափահասների կողմից մարմնական վնասվածքներ կատարելու 17 ամփոփագիր է տրվել , որից միայն 6 դեպքում մարմնական վնասվածքը եղել է սառը կտրող գործիքով: Ոստիկանության ներկայացուցիչն ասաց, որ զբաղվածության նվազմամբ պայմանավորված, ամռանը անչափահասների կողմից իրականացվող հանցագործությունները շատանում են: Իսկ հանցագործությունները կանխելու համար, բանախոսը խորհուրդ տվեց ծնողներին ոստիկանության հետ զուգահեռ աշխատեն. «Ոստիկանները, հատկապես հասարակական վայրերում, ուշադրության տակ են առնում անչափահասներին: Բայց ծնողները պետք է ուշադիր լինեն, թե իրենց երեխաներն ինչն են տնից հանում, ինչ են դնում իրենց գրպանում»: Տիկին Դուրյանի խոսքերով, անչափահաս հանցագործները ոչ միշտ են սոցիալապես անապահով ընտանիքներից.«Այն երեխաներն են, որոնք անուշադրության են մատնված, որոնց հետ ծնողները լիարժեք չեն զբաղվում, որոնց ծնողները զբաղվածության հարցը չեն լուծում »:
Արփինե ՍԻՄՈՆՅԱՆ
Կարդացեք նաև
