«Ես ձեր նման սպասում եմ եւ մտածում եմ` արդյոք կհավաքվի՞ 44 խղճուկ ստորագրություն նրա համար, որպեսզի այդ շատ ոչ խղճուկ եւ շատ տագնապալի հարցը դրվի եւ քննվի Ազգային ժողովում»,- Aravot.am-ի հետ զրույցում դերասան Աշոտ Ադամյանն այսպես պատասխանեց մեր հարցին, թե իր կարծիքով, այնուամենայնիվ, կհավաքվի՞ պահանջվող 44 ստորագրությունը` ԱԺ արտահերթ նստաշրջան հրավիրելու եւ հատուկ հանձնաժողով ստեղծելու:
Նրա խոսքերով` «Եթե ԲՀԿ պատգամավորները շարունակեն հանգստանալ տագնապալի այս վիճակում, կարող է եւ չհաջողվի, ինչը կլինի շատ տխուր»: Մեր հարցին` նկատի ունեք Նաիրա Զոհրաբյանի բացատրությո՞ւնը` նա պատասխանեց. «Այո, այդ բացատրությունն ինձ համար շատ տարօրինակ է: Գնացել են հանգստանալու, հիմա գիտեք ինչ, տագնապ կա մեր երկրում, բայց մենք հանգստանում ենք, ինչի՞ մասին է խոսքը: Ի՞նչ տագնապ, երբ որ Դուբայ պետք է գնանք կամ Անթալիա կամ չգիտեմ ուր` Սեւան , թեկուզ՝ Դիլիջան»,- ԲՀԿ-ին հեգնեց պարոն Ադամյանը:
Մեր դիտարկմանը, որ գուցե դա փախո՞ւստ է` պարոն Ադամյանը պատասխանեց. «Այդ բացատրությունն ինձ չի բավարարում, չգիտեմ, դա արդեն թող իրենք մտածեն` դա փախո՞ւստ է, թե՞ բացատրություն: Ինձ բացարձակ դա չի հետաքրքրում` փախո՞ւստ է, թե՞ եսիմ ինչ է: Ես ընդամենը կարձանագրեմ` փախա՞ն, թե՞ վերջապես հարց բարձրացրեցին»:
Կարդացեք նաև
Մենք ճշտեցինք` սրանով նաեւ կերեւա՞, թե ԲՀԿ-ն իրականում որ դաշտում է` պարոն Ադամյանը պատասխանեց` «Բնականաբար, միայն քայլերով: Կարծեմ իրենց առաջնորդ է ասում, չէ՞, մեր խոսքը գործ է, դե թող լինի: Գործը կտեսնեմ, նոր կիմանամ` խոսքն ինչ արժեք ունի»:
Հռիփսիմե ՋԵԲԵՋՅԱՆ
