Շիրակի մարզպետ Աշոտ Գիզիրյանի հրամանով Գյումրու նորակառույց բազմապրոֆիլ հիվանդանոցի տնօրենի ժամանակավոր պաշտոնակատար է նշանակվել մանկաբարձ-գինեկոլոգ Արմեն Իսահակյանը, ով մինչ այդ զբաղեցնում էր Գյումրու ծննդատան տնօրենի պաշտոնը:
Նշենք, որ 13 միլիոն դոլար արժողությամբ հինգ հարկանի շենքը կառուցվել է Գյումրու կենտրոնում` Համաշխարհային բանկի վարկային ծրագրով և դեռևս շահագործման հանձնված չէ: Մասնագետների հավաստմամբ` այն տիպային հիվանդանոց է, և նման կառույց չկա ոչ Անդրկովկասում, ոչ էլ Հայաստանի որևէ այլ քաղաքում: Այն միավորելու է Գյումրու մյուս բոլոր հիվանդանոցները:
Քանի որ առողջապահության պատասխանատուները հանրապետության երկրորդ քաղաքի առողջապահության փրկության հույսը կապում են հենց այս կառույցի գոյության հետ, ուստի տնօրենի ընտրությունը ևս պատահական չէ: Նշանակել են այնպիսի անձի, ով մեծ ներդրում ունի Գյումրու ծննդատան վերակենդանացման մեջ. գյումրեցիների հավաստմամբ, Արմեն Իսահակյանը իր ղեկավարման 4 տարիների ընթացքում բացառել է կոռուպցիան Գյումրու ծննդատանը, բացի այդ ամբողջությամբ վերանորոգել, ժամանակակից ու հարմարավետ է դարձրել ծննդատունը:
Մեզ հետ զրույցում նորանշանակ տնօրենը խոստացավ Գյումրու նորակառույց հիվանդանոցը դարձնել տարածաշրջանի հեղինակավոր բժշկական հաստատություններից մեկը, այնպես աշխատել, որ այն գրավիչ դառնա ոչ միայն ջավախքահայության, այլև Վրաստանի մյուս բնակիչների համար: Արմեն Իսահակյանի տեղեկացմամբ, այս նպատակի իրագործմանը կնպաստի նորակառույցում հիվանդանոցում մեկ միլիոն դոլար արժողությամբ կորոնոգրաֆիայի սարքի տեղադրումը, որից երկրորդը չկա Հյուսիսային տարածաշրջանում: Փաստորեն այսուհետ Գյումրիում կատարվելու է սրտի կորոնոգրաֆիա և ստենդավորում` Նորք -Մարաշ բժշկական կենտրոնի լավագույն մասնագետների հետ համատեղ: Արմեն Իսահակյանը նաև փոխանցեց, որ Գյումրու մյուս բոլոր հիվանդանոցների օպտիմալացման արդյունքում որևէ մեկը գործազուրկ չի դառնալու, աշխատանքից չի ազատվելու: Ավելին, ըստ նորանշանակ տնօրենի, նույնիսկ նոր` մոտ 30 աշխատեղեր են բացվելու, օրինակ` ընդունելու են կարդովիրաբույժների, նույն բաժանմունքում աշխատող բուժքույրերի: Նշենք, որ այժմ Գյումրու Ծննդատունը ժամանակավորապես ղեկավարում է մարզի գլխավոր գինեկոլոգ Ֆելիքս Գրիգորյանը, ով ժամանակին եղել է հենց ծննդատան տնօրենը, սակայն թոշակի անցնելու պատճառով պաշտոնազրկվել էր: Ծննդատան աշխատակիցները մեր միջոցով մարզպետ Գիզիրյանին խնդրեցին այս պաշտոնում նշանակել այնպիսի մեկին, որի աչքը կուշտ կլինի, ինտրիգներ չի սիրի ու ավելորդ պատմություններ չի սարքի:
Կարդացեք նաև
Նունե ԱՐԵՎՇԱՏՅԱՆ
