Ավազակային հարձակում կատարելու համար 7 տարվա ազատազրկման դատապարտված Վանաձոր ՔԿՀ կալանավոր Վարդան Դումանյանը արդեն երեք օր է հացադուլի մեջ է :
Այդկերպ նա իր բողոքն էլ արտահայտում վերջերս Լոռու մարզի առաջին ատյանի դատարանի կայացրած որոշման:
Նրա մայրը` Գայանե Դումանյանը, մեզ հետ զրույցում նշում է, որ թեեւ չի ժխտում, որ որդին հանցանք է կատարել, բայց պնդում է, որ որդին ոչ թե հարձակվել է քաղաքացու վրա, այլ խուլիգանություն է արել, ինչի համար պատրաստ է կրել իր պատիժը: «Համամիտ եմ, արել ա, թող պատիժը ստանա: Բայց այդ դեպքը ավազակային հարձակում չի, որովհետեւ մարդը մեկ հոգով երբեք չի կարող ավազակային հարձակում կատարել »:
Համաձայն մեղադրական եզրակացության` Վարդան Դումանյանը մի խումբ անձանց հետ նախնական համաձայնությամբ ավազակային հարձակում է կատարել քանդակագործ Գերասիմ Թումանյանի վրա, նրանից հափշտակել զգալի չափերով գումար եւ թողնելով ուշագնաց վիճակում ՝ մյուս անձանց հետ հեռացել բնակարանից:
Կարդացեք նաև
Սակայն մինչ օրս ոչ հանցակիցներն են հայտնաբերվել, ոչ էլ պարզվել է նրանց ինքնությունը:
«Նախաքննությունը հենց առաջին օրից սխալ գնաց: Թող նորից գործը քննեն ու պարզեն, թե որտեղից եղավ ավազակային հարձակում, այն դեպքում, երբ քննության ընթացքում չհայտնաբերվեցին մատնանշված երկու անձինք »:
54-ամյա մայրը ուշադրություն է դարձնում այն հանգամանքին, որ տուժողը, լինելով քանդակագործ, մինչ օրս չի կարողացել նկարագրել մյուս երկու անձանց արտաքին տվյալները` մազերի, հագուստի գույնը, դիմագծերը եւ այլն:
«Խուլիգանություն ա արել, իրար հետ խմել են, իրար հետ կռվել: Դա ավազակային հարձակում չի: ԸՆկել են մի հարբեցողի խելքին, ու նա իր տեսակետն է առաջ քաշել, նախաքննական մարմինն էլ այդպես գրել, սիրունացրել, դարձրել է ավազակային հարձակում »:
Մայրը պնդում է, որ մյուս երկու անձինք մտացածին են, իր որդին մենակ է եղել այդ օրը:
Գործի նյութերով պարզվել է, որ դեպքի օրը տուժող Գերասիմ Թումանյանը եղել է ալկոհոլային հարբածության վիճակում, ինչն ապացուցվում է նաեւ վկաների ցուցմունքներով:
Դատարանի կայացրած որոշման դեմ իրենց բողոքն են արտահայտում ոչ միայն Վարդան Դումանյանի փաստաբան Գուրգեն Հարությունյանը, այլ նաեւ «Ոսկե միջին-հասարակական նախաձեռնությունների կենտրոն» ՀԿ –ն` ի դեմս նախագահ Հովհաննես Ղազարյանի:
Կազմակերպությունը նամակ է ուղարկել ՀՀ գլխավոր դատախազ Աղվան Հովսեփյանին, Ոստիկանության պետ Վլադիմիր Գասպարյանին և Արդարադատության նախարար Հրայր Թովմասյանին` խնդրանքով կայացնել արդարադատություն:
«ՀՀ գլխավոր դատախազ Աղվան Հովսեփյանին, Ոստիկանության պետ Վլադիմիր Գասպարյանին և Արդարադատության նախարար Հրայր Թովմասյանին.
Հարգելի պարոնայք.
Ձեզ ենք դիմում Վանաձոր քաղաքի բնակիչ, 33-ամյա Վարդան Դումանյանի խնդրի կապակցությամբ, ում պատկան մարմինները դաժանորեն դատապարտել են 7 տարվա ազատազրկման՝ չկատարած հանցանքի համար: Այժմ նա գտնվում է Վանաձորի ՔԿՀ-ում` հացադուլի մեջ:
Սկզբում նրա կատարած հանցանքը որակվում էր խուլիգանություն (պատժաչափը 2 ամիս կալանք կամ մինչև 2 տարի ազատազրկում), իսկ հետո նախաքննություն իրականացնող մարմինը փոփոխեց այն` ներկայացնելով որպես խմբակային ավազակային հարձակում, այդ տեսքով մեղադրականը ներկայացրեց դատարան, որի արդյունքում Վարդանին դատապարտեցին 7 տարվա ազատազրկման…
Ոչ նախաքննական մարմինը, և ոչ էլ դատարանը հաշվի չառան գործում առկա խմբակային ավազակային հարձակման համար փաստերի բացակայությունը, վկաների միմյանց ու իրենց իսկ խոսքերին հակասող վկայությունների անարժանահավատությունը: Դեպքի պահին ծայրահեղ հարբած վիճակում գտնված տուժողի հակասական ցուցմունքն ի գիտություն ընդունելով, տղային, ով արդեն շուրջ 10 ամիս կալանավորված էր, դատապարտեցին երկար տարիներ անցկացնելու բանտում՝ չկատարած հանցանքի համար(դատական գործի համարը՝ ԼԴ/0116/01/12):
Պարոնայք, անհասկանալի է, թե այդ ինչպես պատահեց, որ տասը ամիս տևած նախաքննության ընթացքում այդպես էլ չհայտնաբերվեցին «հանցակիցները», որոնց մասով մեղադրականում գրված է՝ «քննությամբ չպարզված հանգամանքներում նախնական համաձայնության է եկել ինքնությունը չպարզված երկու անձի հետ… » (քրեական գործի համարը՝ 19128011):
Հարգելի պարոնայք, մենք ուսումնասիրեցինք Վարդան Դումանյանի գործը և նույնիսկ իրավական դաշտից հեռու մարդու համար ակնհայտ է վերոնշյալ հանցանքի մտացածին լինելը: Իսկ Վարդանը 08.10.2012թ-ից հացադուլի մեջ է, քանի օր կդիմանա տղան, դա անհայտ է:
Հարգարժան պետական այրեր, դիմում ենք Ձեզ և պահանջում կարգադրել վերանայել գործը` այդ գործընթացում ներգրավելով նաև մեզ` որպես քաղաքացիական հասարակության ներկայացուցիչներ: Մենք, ներգրավված լինելով, կկատարենք մոնիթորինգ և հատուկ զեկույցով արդյունքները կներկայացնենք ՀՀ նախագահին, ում արդեն գրությամբ տեղեկացրել ենք գործի մասին` խնդրելով նաև իր միջամտությունը»,-ասված է նամակում:
Անուշ ԲՈՒԼՂԱԴԱՐՅԱՆ
Վանաձոր
