«Մենք բազմիցս ասել ենք, որ Օղակաձեւ զբոսայգում, որն այդքան ծանրաբեռնված է սրճարաններով, նման երկաթբետոնե կոնստրուկցիաներով բազմահարկ կառույց չի կարելի կառուցել: Բայց մենք տեսնում ենք, թե այդ թեթեւ սրճարաններն ինչպես են վերածվում շինությունների: Այլ բան է թեթեւ կոնստրուկցիաներից ինչ որ բան տեղադրելն, այլ բան է երկաթբետոնից բազմահարկ շենք սարքելը»,-Aravot.am-ի հարցին այսպես պատասխանեց Ճարտարապետների միության նախագահ Մկրտիչ Մինասյանը: Մենք նրանից հարցրել էինք, թե երեկ Խանջյան 20-ում տեղի ունեցած փլուզումն ինչի՞ հետեւանք կարող էր լինել եւ արդյոք թույլատրելի՞ է այգում այդպիսի կառույցի գոյությունը: Ճարտարապետի կարծիքով, չի բացառվում, որ դեպքը տեղի ունեցած լինի տեխնիկական բացթողումների հետեւանքով, բայց ասաց. «Կազմվել է հանձնաժողով, որոնք ուսումնասիրում են եւ արդյունքները կասեն»:
Երեկ նաեւ վարկած էր շրջանառվում, որ կառուցապատողը նախագծային շեղումներով է շենքը կառուցել, ինչն էլ դարձել է փլուզման պատճառ: Որպես մասնագետ, պարոն Մինասյանից հետաքրքրվեցինք, թե շա՞տ են դեպքերը, երբ կառուցապատողը շեղվում է հաստատված նախագծից եւ ով պետք է վերահսկի, որ դա տեղի չունենա: «Քիչ չեն այն դեպքերը, երբ նախագծային շեղումներով են կառուցվում այս կամ այն կառույցները, ասենք` 6 հարկ է նախատեսված, բայց մեկ էլ տեսնում ես դարձրին 8: Դրանք անթույլատրելի են: Գոյություն ունեն տեխնիկական հսկիչներ, որոնք պարտավոր են շինարարության ընթացքը վերահսկել եւ ճիշտ է կառուցվում, թե ոչ: Նրանք էլ պիտի արգելեն կառուցապատողին»,-ասաց պարոն Մինասյանը:
Ճարտարապետների միության մասնագետները պարբերաբար մասնակցում են քաղաքաշինության խորհրդի նիստերին: Ըստ միության նախագահի, իրենք մշտապես բարձրացնում են այդպիսի հարցերը, սակայն, ոչ ոք չի փորձում արգելք կամ խոչընդոտ հանդիսանալ:
Լուսինե ԲՈՒԴԱՂՅԱՆ
