Ամեն տարվա ջեռուցման սեզոնին ընդառաջ` Սիսիան քաղաքի տասնյակ ու տասնյակ ծառեր զոհ են գնում քաղաքային համանքի ենթակայությամբ գործող մանկապարտեզներն եւ արտադպրոցական հաստատությունները ջեռուցելու գործին:
Եվ «զոհաբերվում են» հատկապես հաստաբուն ու երկարամյա ծառեր, որոնց բնափայտը, բնականաբար, մի քանի տասնյակ խորանարդ վառելափայտ պիտի ապահովի: Արանքում, ձեռի հետ, չեն զլանում կտրել նաեւ նախորդ տարիներին մի քանի անգամ «էտահատման ենթարկված» , նաեւ` միմյանց բավականաչափ մոտ գտնվող ծառեր` «արանքից քաղհանելով» դրանք:
Լրագրողի հարցին, թե ինչու են այսպես անխնա կտրատում Նժդեհի փողոցի մի քանի հաստաբուն ուռենիները, նրա` դեպքի վայրում անակնկալ հայտնվելուց առանձնապես դժգոհ կոմունալի բրիգադավար Սոս Օհանյանը պատասխանեց, որ ծառերը կտրում են, որ հանկարծ դրանք չընկնեն անցորդների գլխին: Ի պատասխան լրագրողի զարմանքի, թե այսքան տարի որ չեն ընկել, հիմա ինչու՞ պիտի ընկնեն, Սոս Օհանյանը պատասխանեց, թե` ծառերի բները փտած են ու տանում են մանկապարտեզների ջեռուցման համար: «Բա որ փտած են, ինչպե՞ս են տաքացնելու» մեր հարցը, իսկապես, հունից հանեց բրիգադավար Սոսին, եւ նա, գուցե չպատկերացնելով, կամ`շատ լավ պատկերացնելով լրագրողի` դեպքի վայրում գտնվելու հետեւանքները, բայց, բարգավաճած քաղաքապետի մտերիմը լինելու երաշխիքով «պաշտպանված»` դիմեց իրեն «անհանգստացնող» լրագրողին` ասելով «Գործ չունե՞ս, գնա գործիդ: Էդ ապարատն էլ հեռու տար, խանգարում ա, կամ էլ` կջարդեմ», մոռանալով, որ լրագրողն այդ պահին հենց իր իսկ աշխատանքի մեջ էր:
Իսկ թե ինչու են ձեռի հետ էլ կտրում նույն փողոցի երիտասարդ ծառերը, ի համեմատ «փտածների»մեր հարցին, Սոս Օհանյանը վրդովմունքով ասաց` «Կտրում ենք, որ կողքի յոլկեքին չխանգարեն»:
Միայն «յոլկեքի» համար չէ, որ «սրտացավ են» բրիգադիր Սոսն ու մյուսները, հապա նրանց կողմից կատարված ծառերի «գեղարվեստական մշակումները…» Սիսական փողոցում: Ցանկացած դիզայներ ու գյուղատնտես կնախանձեր ծառերի տեսքի ««ձեւափոխման» այն մեթոդին, որ կիրառում են Սիսիանում (տես` լուսանկարում), հետո էլ ասում են` փտած ա…
Անցորդներն էլ, տեսնելով վայրագ ծառաջարդը, տարակուսած ու ափսոսանքով հարցնում էին` ինչու՞ են այսպես անում…
Արեւհատ ԱՄԻՐՅԱՆ
Սիսիան