Նախագահ Սերժ Սարգսյանն այսօր ընդունել է Նոբելյան մրցանակակիրներ Թիմ Հանթին (Մեծ Բրիտանիա) և Մարտին Չալֆին (ԱՄՆ), ովքեր պատրաստակամություն են հայտնել մեր երկիր այցի շրջանակներում ծանոթանալ Հայաստանի գիտակրթական ոլորտի խնդիրներին, իրենց փորձով կիսվել տեղի մասնագետների հետ, հանրային դասախոսություններ կարդալ և կլոր-սեղան քննարկումներ անցկացնել հատկապես երիտասարդ գիտնականների համար:
Նախագահը ողջունել է մեծանուն գիտնականներին և կարևորել այն առաքելությունը, որով նրանք ժամանել են Հայաստան:
Զրուցակիցները երկուստեք ընդգծել են գիտությամբ զբաղվելու երիտասարդության ձգտումները խրախուսելու, կրթության, գիտության ոլորտներում նվաճումներին, աշխարհի առաջավոր փորձին նրանց հաղորդակից դարձնելու ուղղությամբ աշխատանքի կարևորությունը և հույս հայտնել, որ այդ առումով Հայաստանի երիտասարդության հետ Նոբելյան մրցանակի արժանացած գիտնականների հանդիպումները հետաքրքիր ու օգտակար կլինեն:
ՀՀ նախագահի աշխատակազմ
