«Հուզիչ ելույթ է լինելու որովհետեւ հայերի հետ եմ»,-այսօր լրագրողների հետ հանդիպման ժամանակ նշեց ԽՍՀՄ ժողովրդական արտիստ, երգիչ Իոսիֆ Կոբզոնը:
Երգիչը շատ ուրախ է, որ կրկին Երեւանում է: Վերջին անգամ ցրտի ու սովի տարիներին էր եկել: Բերել էր հումանիտար օգնություն՝ շաքարավազ եւ ալյուր երեխաների համար. «Հայերի հետ ինձ մեծ ընկերությունն է կապում: Եղել եմ էջմիածնում, խոնարհվել եմ այն եկեղեցու առջեւ, որը հայերի համար շատ թանկ է»:
Արտիստի պնդմամբ վատն է այն մարդը, ով հաշվում է իր տարիքն ու փողերը. «Մեր՝ արտիստներիս համար ստեղծագործական աշխատանքը նարկոտիկ է, սակայն հիմա տարիքի առումով աշխատելը դժվար է դարձել: Ինձ ավելի դուրեկան է, երբ արտիստի մասին խոսում են ինչպես լավ մարդու՝ արտիստները լավ մարդիկ են»:
Կոբզոնը թոշակի երբեք չի գնա, եթե հեռանա էլ էստրադայից կլինեն այնքան գործեր, որ զբաղվածությունը կլրացնեն: Հայերի եւ Արարատի մասին Կոբզոնը պատմում է թոռներին. «Երեւանում տեսել եմ Առնո Բաբաջանյանի արձանը: Սիրում եմ շատ նրա արձանը, նրանում այնքան Առնո կա, որ ես անգամ տեսնում եմ նրան, նրա էմոցիաները, դեմքը, շարժումը: Այն մարդիկ, ովքեր նրան ճանաչել են որպես մարդ, ուրեմն հավանում են արձանը: Մենք եղբայր երկրներ ենք, ես դա զգում եմ»:
Կարդացեք նաև
Արամ Խաչատրյան համերգասրահում այսօր տեղի կունենա ԽՍՀՄ ժողովրդական արտիստ, երգիչ Իոսիֆ Կոբզոնի ծննդյան 75-ամյակին նվիրված հոբելյանական հյուրախաղերի երեւանյան համերգը: Համերգից ստացված հասույթը կուղղվի ՀՀ նախագահի տիկին Ռիտա Սարգսյանի հովանու ներքո գործող Երաժշտական գործիքների շրջանառու հիմնադրամին Գյումրու երաժշտական դպրոցների համար երաժշտական գործիքների ձեռքբերման նպատակով:
Համերգի ընթացքում մեծանուն երգչի կատարմամբ կհնչեն Ա. Բաբաջանյանի, Ալ. Պախմուտովայի, Գ. Մովսիսյանի, Ա. Ֆլյարկովսկու, Ա. Օստրովսկու եւ այլ ճանաչված կոմպոզիտորների հանրահայտ ստեղծագործություններ: Երեւանյան այցելության շրջանակներում երգչին կընդունի ՀՀ նախագահ Սերժ Սարգսյանը:
Անժելա ՇԱՀՈՒՄՅԱՆ
