12.12.2012 այն ամսաթիվն է, որ ոմանց վախ էր ներշնչել, ոմանց` հետաքրքրություն, շատերը սպասողական վիճակում պետք է լինեին, մյուսների համար էլ օր հերթական էր:
19-ամյա Արևիկը ժամը 12:12-ին երազանք է պահել 🙂 համոզված է՝ կատարվելու է. «Նախորդ տարի էլ, երբ 11.11.2011 էր ասում էին ժամը 11:11-ին երազանք պետք է պահել, չնայած չէի հավատում, բայց փորձեցի. պատահական համընկավ թե ինչպես, բայց երազանքս կատարվեց, դրա համար այս տարի էլ պահեցի», – ասաց նա:
Իսկ 22-ամյա Աստղիկի համար «գոլդ» ամսաթիվն այնքան էլ սպասված չէ. «Նախորդ տարի 11.11.2011-ին ինձ հետ մի վատ բան պատահեց, դրա համար էլ վախով էի հիշում, որ նորից այդպիսի մի օր ենք ունենալու»: Այնուամենայնիվ ինչպես ինքն է ասում՝ հուսով է նույնը չի կրկնվի այսօր:
12.12.12-ը ամենահիշարժանը կլինի հատկապես նրանց համար, ովքեր հենց այս օրն են պսակադրվել: Քաղաքացիական կացության ակտերի գրանցման գործակալության Աջափնյակի և Դավթաշենի բաժնից մենք իմացանք, որ այսօր զագսավորվել է 6 զույգ, ովքեր 12.12.12-ի համար նախապես գրանցվել էին ամիսներ առաջ:
Օրն էլ ավելի յուրահատուկ է նրանց համար, ում ծննդյան տոնն է այսօր: Նրանցից մեկն էլ «Էմփիրեյ» խմբի անդամ Գիսանե Պալյանն է: 12-ների շարանը ոչ մի բացասական ազդեցություն չի ունեցել օրվա վրա, Գիսանեն չի էլ հավատում նման բաների, ծննդյան տոնն էլ, ինչպես յուրաքանչյուր տարի՝ նշելու է ընտանիքի անդամների հետ. «Ես գիտեմ, որ միշտ լինում է այն, ինչ պետք է լինի, ավելորդ է ինչ – որ վատ ակնկալիքներ ունենալ օրվանից», – ասաց Գիսանեն: Ժամը 12:12-ին երազանք չի պահել, ինչպես արել են դա շատերը, բայց պատճառն այն չէ, որ նա չի հավատում երազանքների իրականացմանը, այլ ամեմնամեծ խնդիրն ու պատճառը նրա զբաղվածությունն է եղել: Թեև երազանքներ սովորաբար Ամանորի գիշերն է պահում միայն, բայց այսօր խոստացավ բացառություն անել. «Արդեն մի քանի տարի է, ինչ ծննդյանս օրը մոմ չեմ փչում ու երազանք չեմ պահում, բայց լավ խորհուրդ տվեցիք, դրան հետևելով` այսօր անպայման տորթի վրա մոմ կդնեմ ու փչելուց առաջ երազանք կպահեմ», – մեզ հետ զրույցում խոստացավ Գիսանեն:
Տիգրանուհի Թասլակյան
