Երկու օր է՝ դեպի Հայաստան բեռնափոխադրումների համար նախատեսված միակ ավտոտրանսպորտային ճանապարհը` Լարսը, բեռնատարների համար էլ է մասամբ գործում: Սա Aravot.am-ի հետ զրույցում հավաստիացրին հայկական բեռնափոխադրող ընկերությունների պատասխանատուները:
Օրվա որոշ ժամերի, եղանակային պայմանները թույլ են տալիս, որ բեռնատարները տեղաշարժվեն, սակայն ինչպես բեռնափոխադրողներն են հայտնում, սահմանակետում «սարսափելի մեծ հերթեր են գոյացել»: Իսկ հերթերի պատճառն այն է, ըստ մեր զրուցակիցների, որ Լարսի սահմանակետը գործում է առավոտյան ժամը 7-ից մինչեւ երեկոյան ժամը 19-ը:
Բացի ժամանակային կորստից, որոշ բեռնափոխադրող ընկերություններ այս օրերին նաեւ ֆինանսական վնասներ են կրել, քանի որ ստիպված են եղել իրենց բեռները Ուկրաինայով` նավով բերել, ինչն, ըստ մասնագետների, մոտ 30 տոկոսով ավելացնում է տրանսպորտային ծախսերը:
«Միրա Տրանս»-ից հայտնեցին, որ օրերով կայանելու հետեւանքով թե’ մեքենաների ծախսային մասն է ավելանում, թե պատվիրատուներն են վնասներ կրում. «Այս բեռները սեզոնային են եւ նախատեսված են մինչեւ Նոր տարվա սպառման»:
Մեր հարցին, թե ուշացումների պատճառով առաջացած ծախսերն ո՞ւմ վրա են մնում, ընկերության մենեջերն ասաց, որ չնայած պայմանագրային պարտավորություններին, այսպիսի ֆորսմաժորային իրավիճակներում ոչ տրանսպորտային ընկերությունը, ոչ էլ պատվիրատուն պահանջներ չեն ներկայացնում:
Բեռնափոխադրող «Մել տրանս» ընկերության ղեկավար Սամվել Մելիքյանն էլ բեռնատարների` սահմանակետը հատելու դանդաղ գործընթացը պայմանավորեց սահմանի աշխատելու ժամային սահմանափակումով: Ըստ նրա, ի տարբերություն ձմռան, տաք սեզոնին անցակետն աշխատում է 24 ժամ:
Կարդացեք նաև
Պարոն Մելիքյանի խոսքերով, վերջին 3-4 տարիներին «սարը» չի փակվում, քանի որ վրացիները հայկական կողմի հորդորով քարշակներ են աշխատեցնում եւ ձյան մեջ մնացած բեռնատարներին օգնություն են ցուցաբերում. «Ճիշտ է վճարովի ծառայություն է, բայց մեծ օգնություն է վարորդներին»:
«Մել տրանս» ընկերության ղեկավարի ներկայացմամբ, ամենավտանգավոր սեզոնը, Լարսի ճանապարհի համար, ձնհալի սեզոնն է`ապրիլն է, երբ հալք է տեղի ունենում եւ թաց ձյունը սարերից գահավիժում է:
Լուսինե ԲՈՒԴԱՂՅԱՆ
