«Աշխատանքի պետական տեսչությունը կարող է խախտումը արձանագրել, բայց տեսչությունը դատարան չէ եւ չի կարող պարտադրել, որ գործատուն խախտումը վերացնի»:
Եկամտային հարկի մասին օրենքի ներդրումից հետո որոշ գործատուներ աշխատողներին առաջարկում են աշխատանքից ազատվելու դիմում գրել, որպեսզի կարողանան աշխատավարձի նոր չափ սահմանել: Այսօր «Նոյյան Տապան» լրատվական կենտրոնում այս մասին ասաց Հայաստանի գործարարների հանրապետական միության գործադիր տնօրեն Վահան Սիմոնյանը: Նա աշխատողներին կոչ արեց նման դեպքերում իրենց շահերի պաշտպանության հարցով դիմել Աշխատանքի պետական տեսչություն կամ` գործատուների հանրապետական միություն` խորհրդատվություն ստանալու համար:
Եկամտային հարկի մասին օրենքով, գործատուին չի թույլատրվում աշխատավարձը նվազեցնել, քան նախկինում էր:
Մեր երկրում աշխատողի իրավունքները շատ հաճախ են խախտվում, փաստում է պարոն Սիմոնյանը, բայց, ըստ նրա, աշխատանքային օրենսգիրքը նախատեսում է նրանց իրավունքների պաշտպանության մի շարք կետեր. «Ցանկացած աշխատող, եթե գտնում է, որ իր աշխատանքային իրավունքը խախտվել է, հիմնականում խնդրի կարգավորման համար դատական կարգով վիճարկվում է: Աշխատանքի պետական տեսչությունը կարող է խախտումը արձանագրել, բայց տեսչությունը դատական համակարգ չէ եւ չի կարող պարտադրել, որ խախտումը վերացնեն: Աշխատողը պետք է իմանա իր իրավունքները, որպեսզի իմանա, թե որ մասով է իր իրավունքները խախտել գործատուն, որպեսզի իր շահերը պաշտպանելու համար հստակ կողմնորոշվի: Ցանկացած գործատու էլ պետք է հիմնավորի ազատման պատճառները»:
Aravot.am-ի հարցին, թե մեր երկրում գործատուի իրավունքները խախտվո՞ւմ են, պարոն Սիմոնյանն ասաց, որ նրանց իրավունքները օրենքի փոփոխությունների դեպքում է խախտվում: Պարոն Սիմոնյանի պատասխանը` տեսանյութում`
Վահան Սիմոնյանի ներկայացմամբ, Հայաստանում գործազրկության մակարդակը ոչ պաշտոնական տվյալներով մոտ 30 % է, եւ այդ է պատճառը, որ շատ աշխատողներ չեն ընդվզում գործատուի անօրինականությունների դեմ եւ գերադասում են խախտված իրավունքներով աշխատել, քան` աշխատանքից զրկվել. «Այ դրա համար մեր իրավագիտակցությունը պետք է բարձրացնենք, Եվրոպայում շատ լավ գիտեն իրենց իրավունքները եւ գիտեն, որ գործատուն չի կարող անհիմն կարգով իրեն աշխատանքից ազատել»:
Աշխատանքային օրենսգրքով պահանջվում է, որպեսզի 5-օրյա ռեժիմով աշխատելու դեպքում հանգստյան օրերը հաջորդեն միմյանց, իսկ հերթափոխով աշխատելու դեպքում, խնդիրը օրենսգրքով չի կարգավորվում, նա ճիշտ է, երկու օրվա հանգստի իրավունքը ստանում է, բայց երկու օր չի հանգստանում, տարբեր օրեր` 2 օրը մեկ:
Կարդացեք նաև
Լուսինե ԲՈՒԴԱՂՅԱՆ
