«Լոս Անջելես թայմս» թերթը, հրապարակելով Դենվերում հաստատված լուսանկարիչ Նիշ Նալբանդյանի Սիրիայի հակամարտության մասին աշխատանքները, գրում է՝ նա մոտոցիկլետով շրջել է աշխարհով մեկ ու լուսանկարներ արել: 2009թ. իր եղբոր հետ մոտոցիկլետով Սան Դիեգոյից գնացել է Կահիրե` այցելելով նաև Սիրիա, որտեղ ծանոթացել են Դարա քաղաքի բնակիչների հետ, հենց այդ քաղաքից էլ սկսվել է մինչև հիմա շարունակվող հեղափոխությունը: Այդ մարդիկ իր մտքում էին, երբ սկսվեց ապստամբությունը: Վերջերս Նալբանդյանը վերադարձել էր Սիրիա ու լուսանկարել պատերազմի մեջ գտնվող մարդկանց:
Այս աշխատանքների նկարագրության մեջ Նալբանդյանը գրել է. «Ես ընտրել եմ այս ոճը, քանի որ ինձ հետաքրքրում է, թե ինչպես են մարդիկ ապրում հակամարտությունների մեջ, ինչ ազդեցություններ է այն ունենում, ու ես տարված էի այս մարդկանց զգացումները պատկերող լուսանկարներ անելու գաղափարով: Ես իմ պապի մի հին նկար ունեմ, որն արվել է 1915թ, երբ նա փախել էր՝ փրկվելու Հայոց ցեղասպանությունից: Նա լուսանկարվելու ավանդական դիրք է ընդունել այդտեղ: Լուսանկարը հավանաբար իր Սիրիա գնալու ճանապարհին է արված: Երբ սկսեցի գործի անցնել, ես այդ նկարն ունեի իմ մտքում, բայց ավելի ժամանակակից ոճով»:
Պատրաստեց Հովհաննես ԻՇԽԱՆՅԱՆԸ
