«Աշխարհում կա մի ձեւ իշխանությունը վերցնելու, դրանք ընտրություններն են: Մեր երկրում համապետական ընտրություններն ավարտված են: Իհարկե, եղան քաղաքական ուժեր, որոնք մայրաքաղաքի ընտրությունները փորձեցին վերածել համապետականի: Եթե ուզում են գալ իշխանության, թող հանգիստ պատրաստվեն 2017 թվականի ընտրություններին»,-ՀՀԿ գործադիր մարմնի նիստից հետո լրագրողների հետ զրույցում խոսելով ներքաղաքական իրողությունների մասին, ասաց ՀՀԿ խոսնակ, ԱԺ փոխնախագահ Էդուարդ Շարմազանովը:
Սա հակադարձումն էր ԲՀԿ խմբակցության քարտուղար Նաիրա Զոհրաբյանի այն հայտարարությանը, թե ԲՀԿ-ն խաղաղ ճանապարհով գալու է իշխանության:
Օրերս, Սուրբ Հովհաննես Մկրտիչ եկեղեցու բացման արարողության ժամանակ ԲՀԿ առաջնորդի արած հայտարարությունը, որ ԲՀԿ-ն չի կարող ընդդիմություն լինել, Շարմազանովի գնահատմամբ, որոշ ԲՀԿ-ականների համար սառը ցնցուղ էր. «Մարդն իր կարծիքն է ասել, ուղղակի փաստեցինք, որ ԲՀԿ առաջնորդի հայտարարությունը սառը ցնցուղ էր ԲՀԿ որոշ գործիչների համար: Իսկ թե ԲՀԿ-ն ընդդիմություն կլինի, իշխանություն, թե այլընտրանք, դա իրենց կուսակցության ներքին խնդիրն է»:
Էդուարդ Շարմազանովը հավանաբար նկատի ուներ Վարդան Օսկանյանին, ով վերջերս իր ֆեյսբուքյան պատին գրառում էր թողել այն մասին, թե ԲՀԿ-ն պետք է իրեն ընդդիմություն հռչակի:
Կարդացեք նաև
Նելլի ԳՐԻԳՈՐՅԱՆ
