Հուլիսի 7-ին, ժամը 08:41-ին Վրաստանի Հանրապետության ՆԳՆ ԱԻ դեպարտամենտից ՀՀ արտակարգ իրավիճակների նախարարությունը տեղեկություն է ստացել, որ ժամը 01:46-ին Ռուսաստանի Դաշնությունից Հայաստանի Հանրապետություն ուղեորվելիս՝ Շուլավերի բնակավայրի մոտակայքում, տեղի է ունեցել ճանապարհատրանսպորտային պատահար:
ԱԻ նախարարության տեղեկացմամբ, դեռևս չբացահայտված հանգամանքներում «Շեվրոլե» մակնիշի K175EE/RUS պետհամարանիշով ավտոմեքենան (վարորդ՝ ՀՀ քաղաքացի Արմեն Գալակտյան) դուրս է եկել երթեւեկելի մասից ե կողաշրջվել է, ինչից ավտոմեքենայի ուղեորներ ՀՀ քաղաքացիներ Առուստամ Առուստամյանը (ծնվ. 1958 թ.), Մարինե Գեորգյանը (ծնվ. 1965 թ.), ՌԴ քաղաքացիներ Ռոման Առուստամյանն (ծնվ. 1999 թ.) ու Ալեկսի Առուստամյանը (ծնվ. 2002 թ.) տարբեր աստիճանի մարմնական վնասվածքներով հոսպիտալացվել են Մառնեուլի բժշկական կենտրոն, որտեղ բժիշկները Առուստամ Առուստամյանի առողջական վիճակը գնահատել են միջին ծանրության, իսկ մյուսներինը` բավարար: